گوگل نیوز پر ہمیں فالو کریںکراچی کے جناح انٹرنیشنل ایئرپورٹ سے روانہ ہونے والی 6 پروازیں تکنیکی اور آپریشنل وجوہات کی بنا پر منسوخ کردی گئیں جس کے باعث اندرون اور بیرون ملک سفر کرنے والے مسافروں کو مشکلات کا سامنا کرنا پڑا۔
اطلاعات کے مطابق منسوخ ہونے والی پروازوں میں ادیس ابابا، مشہد، اسلام آباد اور لاہور جانے والی پروازیں شامل ہیں۔
متاثرہ پروازیں مختلف ایئرلائنز، جن میں ایئرپلین، ایران ایئر، ایئرسیال، ایئربلیو اور پاکستان انٹرنیشنل ایئرلائنز (پی آئی اے) شامل ہیں، کے زیر انتظام تھیں۔
پی آئی اے حکام کی فراہم کردہ معلومات کے مطابق لاہور جانے والی قومی ایئرلائن کی پرواز پی کے 306 بھی منسوخ کردی گئی۔ اسی طرح ایئربلیو کی اسلام آباد اور لاہور کے لیے شیڈول پروازیں بھی منسوخ ہونے والی پروازوں میں شامل ہیں۔
پروازوں کی منسوخی کے باعث متاثرہ مسافروں کو سفری منصوبوں میں تبدیلی کرنا پڑ سکتی ہے۔
ایئرلائنز کی جانب سے مسافروں کو ہدایت کی گئی ہے کہ وہ ایئرپورٹ روانہ ہونے سے قبل اپنی متعلقہ ایئرلائنز سے رابطہ کرکے پروازوں کی تازہ صورتحال، متبادل انتظامات اور روانگی کے اوقات کی تصدیق کرلیں تاکہ کسی بھی غیر ضروری پریشانی سے بچا جا سکے۔
