کے پی کے میں پہلی مرتبہ خواجہ سرا جرگہ ممبر منتخب

پشاور:  خیبر پختونخوا میں پہلی مرتبہ ایک خواجہ سرا کو جرگہ ممبر منتخب کر لیا گیا۔

پشاور پولیس کی جانب سے جاری کردہ اعلامیے کے مطابق پشاور سے تعلق رکھنے والی خواجہ سراء ثوبیہ خان کو پشاور میں تمام ڈی آر سیز کا ممبر منتخب کرلیا گیا ہے۔

خواجہ سراء ثوبیہ نے بات چیت کے دوران بتایا کہ خواجہ سراء کمیونٹی کے مسائل اور تنازعات کے حل کیلئے محکمہ پولیس کی جانب سے مجھے ممبر بنانا ایک احسن اقدام ہے‘ ٹرانس کمیونٹی کے لئے ہر جگہ آواز اٹھاؤں گی۔

ثوبیہ خان کا کہنا تھا کہ وہ خواجہ سراؤں اور پولیس کے درمیان ایک ‘پل کا کردار’ ادا کریں گی۔ ثوبیہ خان خواجہ سراؤں کے سماجی حقوق کے لیے کام کرتی ہیں اس لیے ان کو پولیس اور خواجہ سراؤں کے درمیان بطور ڈی آر سیز ممبر اہم  کردار ادا کرنے کے لیے چنا گیا ہے۔

یہ بھی پڑھیں: پہلی بار عالمی تجارتی تظیم کی سربراہی خاتون کے سپرد

انھیں پولیس میں بھرتی نہیں کیا گیا اور نہ ہی تنخواہ یا ماہانہ الاؤنس کے حوالے سے کوئی فیصلہ کیا گیا ہے۔ پشاور میں قائم ڈی آر سیز مرکز میں تعیناتی کا مقصد خواجہ سراؤٰں کے تحفظات کو دور کرنا ہے۔

پولیس حکام کا کہنا ہے کہ پشاور میں ڈی آر سیزمیں خواجہ سراؤں کو سہولت فراہم کرنے کا منصوبہ کامیاب ہوا تو اس کو پورے صوبے میں توسیع دی جائے گی۔ پشاور پولیس کا خواجہ سراؤں کے ڈی  آر سیز میں ذمہ داریاں سونپنے کا  مقصد پولیس کی خدمات کو آسان اور قابل احترام انداز میں پیش کرنا ہے۔