شاہراہِ بھٹو پر ڈاکوؤں کا ناکہ! شہریوں سے نقدی اور موبائل فون چھین لیے، ویڈیو وائرل

کراچی میں بڑھتے ہوئے اسٹریٹ کرائمز نے شہریوں کی زندگی اجیرن کر رکھی ہے اور خوف کی یہ فضا دن بدن گہری ہوتی جا رہی ہے۔ تازہ ترین واقعے میں شاہراہِ بھٹو پر دن دہاڑے مسلح ڈاکوؤں نے باقاعدہ ناکہ بندی کرکے لوگوں کو لوٹ لیا۔

اطلاعات کے مطابق دندناتے پھرتے ان ملزمان نے اسلحے کے بل بوتے پر شہریوں کو یرغمال بنایا اور ان سے نقدی، قیمتی موبائل فونز اور دیگر سامان چھین کر فرار ہو گئے۔ دن کے اجالے میں پیش آنے والے اس خونی کھیل نے سکیورٹی اداروں کی کارکردگی پر ایک بار پھر بڑا سوالیہ نشان لگا دیا ہے جس سے عوام میں عدم تحفظ کا احساس شدید تر ہو چکا ہے۔

کراچی ڈاکووں کی حوالے؟؟

شاہراہِ بھٹو پر دن دیہاڑے ڈکیتی کی واردات،
مسلح ملزمان نے ناکہ لگا کر شہریوں سے نقدی اور قیمتی سامان لوٹ لیا اور فرار ہوگئے۔
شہریوں میں خوف و تشویش پھیل گئی۔ pic.twitter.com/ps51FL7jCZ

— Shahid Hussain (@ShahidHussainJM) September 9, 2026

واضح رہے کہ رواں سال اپریل میں بھی شاہراہِ بھٹو پر مسلح ملزمان نے ایک تاجر سے 25 لاکھ روپے لوٹ لیے تھے۔ تاجر کے مطابق ملزمان نے پائیدان پر رکھا رقم سے بھرا تھیلا اٹھایا اور مزاحمت پر اسلحے کے بٹ مار کر اسے زخمی کردیا تھا۔