لاہور، انار کلی کے قریب دھماکہ، 2افراد جاں بحق، متعدد زخمی

لاہور کے علاقے انارکلی کے قریب دھماکے کے نتیجے میں ایک بچے سمیت 2 افراد جاں بحق جبکہ متعدد زخمی ہو گئے ہیں۔ دھماکے کے نتیجے میں اردگرد کی دکانیں متاثر ہوئیں اور گاڑیوں میں بھی آگ لگ گئی۔ 

تفصیلات کے مطابق لاہور کے علاقے نیو انارکلی میں دھماکہ ہوا جس کے نتیجے میں 2 افراد جاں بحق ہو گئے، ریسکیو اہلکار اور پولیس واقعے کی اطلاع ملتے ہی جائے وقوعہ پر پہنچ گئے۔ 

 دھماکے کی جگہ پر کھڑی موٹر سائیکلوں کو شدید نقصان پہنچا۔ڈی آئی جی آپریشنز کا کہنا ہے کہ ہوسکتا ہے کہ دھماکے کیلئے موٹر سائیکل استعمال کی گئی ہو۔ 

یہ بھی پڑھیں:

نسلہ ٹاور کا نقشہ پاس کرنے اور اجازت دینے والے افسران پر مقدمہ درج

دھماکے میں زخمی ہونے والوں کو طبی امداد مہیا کی جارہی ہے۔ میو ہسپتال میں ایمرجنسی نافذ کردی گئی۔ ایم ایس کا کہنا ہے کہ زخمیوں کی تعداد 25 کے قریب ہے۔

حکام کا کہنا ہے کہ دھماکے کی نوعیت کا تعین کیاجارہا ہے۔ میو ہسپتال کے ایم ایس  ڈاکٹر افتخار نے کہا کہ 20 سے زائد زخمیوں میں سے 5 کی حالت تشویشناک ہے۔

ایم ایس میو ہسپتال ڈاکٹر افتخار نے کہا کہ زخمیوں کو ہر ممکن سہولت دے رہے ہیں۔ دوسری جانب وزیر اعلیٰ پنجاب نے دھماکے کا نوٹس لیتے ہوئے آئی جی سے رپورٹ طلب کر لی۔

وزیر اعلیٰ پنجاب نے واقعے کا نوٹس لیتے ہوئے حکام کو ہدایت کی کہ واقعے کی ہر پہلو سے تفتیش کی جائے اور زخمیوں کو علاج کی بہترین سہولیات مہیا کی جائیں۔