لاہور: انسداد دہشت گردی کی عدالت (اے ٹی سی) نے پیر کو سیالکوٹ میں ایک فیکٹری میں سری لنکن فیکٹری منیجر پریانتھا کمارا کے قتل میں ملوث 6 ملزمان کو سزائے موت سنادی۔
قتل کے مقدمے میں کل 89 افراد پر فرد جرم عائد کی گئی تھی، جن میں سے نو نابالغ ہیں۔ عدالت نے ہائی پروفائل قتل کیس کا فیصلہ سناتے ہوئے سات ملزمان کو عمر قید کی سزا سنائی جبکہ 76 مجرموں کو دو سال قید کی سزا سنائی گئی۔
گزشتہ سال پنجاب کے شہر سیالکوٹ میں مشتعل ہجوم نے 48 سالہ سری لنکن شہری اور مقامی فیکٹری منیجر پریانتھا کمارا کو بے دردی سے قتل کردیا تھا، یہ افسوس ناک واقعہ عوام میں غم و غصے کا باعث بنا اور اس وقت کے وزیر اعظم عمران خان نے بدترین تشدد کی مذمت کی تھی اور قصورواروں کو انصاف کے کٹہرے میں لانے کا عزم کیا تھا۔
انسداد دہشت گردی کی عدالت نے جج نتاشا نسیم کی زیر صدارت کوٹ لکھپت جیل میں مقدمے کی سماعت مکمل کی۔ روزانہ کی بنیاد پر سننے والے کیس میں استغاثہ اور دفاع دونوں نے اپنے دلائل مکمل کیے تھے۔
مزید پڑھیں: پریانتھا کمارا کیس، سی سی ٹی وی ریکارڈنگ کی فارنزک رپورٹ آگئی