گوگل نیوز پر ہمیں فالو کریںاسلام آباد:وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ مقبوضہ کشمیر میں آج نمازِ جمعہ کے بعد بھرپور احتجاج ہوگا۔ کشمیری قوم آزاد ی چاہتی ہے۔ ہم ان کے ساتھ ہیں۔
سماجی رابطے کی ویب سائٹ ٹوئٹر پر اپنے پیغام میں وزیر سائنس اینڈ ٹیکنالوجی نے کہا کہ کشمیری غلامی کی زنجیریں توڑنے کا تہیہ کر چکے ہیں اور پاکستان کشمیریوں کی جدوجہد میں ان کا ساتھ دے رہا ہے۔
یہ بھی پڑھیں: عمران خان پاکستانی سیاست کی کہکشاں کا درخشندہ ستارہ ہیں۔ فواد چوہدری
فواد چوہدری نے کہا کہ ہم تحریری و تقریری اور عملی انداز میں بھی کشمیریوں کا ساتھ دیں گے۔اس جدوجہد آزادی کے دوران پاکستان کشمیریوں کی پشت پر کھڑا ہے۔کشمیریوں کو تنہا نہیں چھوڑیں گے۔انہوں نے دعا کی کہ خدا مظلوموں کا مددگار ہو اور کشمیریوں کی ستر سال سے زائد طویل جدوجہد مکمل ہو۔
آج مقبوضہ کشمیر میں جمعہ کی نماز کے بعد بھرپور احتجاج کی کال ہے، کشمیری غلامی کی زنجیریں توڑنے کا تہیہ کر چکے ہیں، پاکستان کشمیریوں کی پشت پر کھڑا ہے،ہم دامے،سخنے ورمے کشمیریوں کی جدوجہد میں ان کے ساتھ ہیں، خدا مظلوموں کا مددگار ہو اور یہ طویل جدوجہد اب تکمیل ہو۔آمین
— Ch Fawad Hussain (@fawadchaudhry) August 23, 2019
یاد رہے کہ اس سے قبل وفاقی وزیر سائنس اینڈ ٹیکنالوجی فواد چوہدری کہہ چکے ہیں کہ پاکستان ایک اعتدال پسند ملک ہے جبکہ بھارت فاشسٹ مودی کا ملک بن چکا ہے جہاں شدت پسندی کو فروغ دیا جاتا ہے۔
ٹوئٹر پر اپنے پیغام میں فواد چوہدری نے کہا کہ پاکستان ایک تحمل پسند، وسیع النظر اور روشن خیال ملک ہے جبکہ اس کے برعکس بھارت مودی حکومت کے زیر تسلط ہے جہاں عدم برداشت کا مظاہرہ کیا جاتا ہے۔
مزید پڑھیں: بھارت فاشسٹ مودی کا ملک بن چکا، پاکستان اعتدال پسند ہے۔ فواد چوہدری
