گوگل نیوز پر ہمیں فالو کریںکراچی: پاکستان تحریکِ انصاف کراچی ڈویژن کے صدر خرم شیر زمان نے سندھ میں ریاست مخالف نعروں کی شدید مذمت کی ہے۔
تفصیلات کے مطابق پی ٹی آئی کراچی کے صدر خرم شیر زمان اور سندھ اسمبلی میں تحریکِ انصاف کے پارلیمانی لیڈر حلیم عادل شیخ نے پارٹی سیکرٹریٹ انصاف ہاؤس میں پریس کانفرنس کرتے ہوئے ریاست مخالف نعروں کی مذمت کی۔
صدر پی ٹی آئی کراچی خرم شیر زمان نے کہا کہ کل ایک ریلی کے دوران اداروں اور حکومت کے خلاف نعرے لگائے گئے، حکومت کے خلاف نعرے قبول ہیں مگر ملک کے خلاف نعرے ہمیں قبول نہیں۔ کل جب نعرے لگ رہے تھے سندھ حکومت کہاں تھی؟
رکنِ سندھ اسمبلی خرم شیر زمان نے سوال کیا کہ نعرے لگانے والوں کے خلاف غداری کے مقدمے کیوں نہ چلائے گئے؟ کیا بلاول کو نعرے سنائی نہیں دئیے؟ سندھ کےلوگ محبِ وطن ہیں۔ جن لوگوں نے ملک کے خلاف نعرے لگائے، ان پر مقدمہ چلایا جائے۔
خرم شیر زمان نے کہا کہ سندھ وہ صوبہ ہے جس نے پاکستان کی پہلی قرارداد منظور کی، کوئی بھی سندھ کے خلاف یا ملک کے خلاف کسی سازش کی سوچ نہ رکھے۔ پریس کانفرنس سے پی ٹی آئی کے مرکزی رہنما حلیم عادل شیخ نے بھی خطاب کیا۔
سندھ اسمبلی میں پی ٹی آئی کے پارلیمانی لیڈر حلیم عادل شیخ نے کہا کہ چیئرمین پیپلز پارٹی بلاول بھٹو زرداری اور وزیرِ اعلیٰ سندھ مراد علی شاہ سندھ کے دورے پر جا کر کہتے ہیں کہ وفاق نے صوبے کیلئے کچھ نہیں کیا۔
پی ٹی آئی کے سینئر رہنما حلیم عادل شیخ نے کہا کہ سعید غنی یاد رکھیں کہ ایڈز اور کتوں کے خلاف، تھر میں بچوں کے خون کے حق کیلئے تحریک چلائیں گے۔ آپ اسلام آباد جائیں، ہم لاڑکانہ جائیں گے۔عوام پی پی پی کیلئے زمین تنگ کرے گی۔ ہم مظلوموں کے ساتھ کھڑے ہیں۔
یہ بھی پڑھیں: خرم شیر زمان کا محکمۂ زراعت کے خلاف مقدمے کا مطالبہ
