اسلام آباد: وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ پیپلز پارٹی کا بنیادی نظریہ ختم ہوچکا ہے جبکہ پارٹی کے آدھے رہنما پی ٹی ایم اور آدھے جیئے سندھ کو قابل تقلید سمجھتے ہیں۔
سماجی رابطے کی ویب سائٹ ٹوئٹر پر اپنے ایک پیغام میں فواد چوہدری نے کہا کہ جس سیاسی نظرئیے کے تحت پیپلز پارٹی ایک قوت بن کر اُبھری اس کے اختتام کے باعث پیپلز پارٹی رہنما یہ سمجھنے سے قاصر ہیں کہ اب آگے کیا کرنا ہے۔
یہ بھی پڑھیں: مریم نواز نے چوہدری شوگر ملز کیس میں ضمانت کے لیے درخواست دائر کردی
پیپلز پارٹی کے سینئر رہنما فرحت اللہ بابر کے حوالے سے فواد چوہدری نے کہا کہ فرحت اللہ بھی دماغی ہیجان کا شکار ہیں، اسی لیے انہوں نے طارق فتح کی حمایت کی۔ دماغ کی کیفیت ہیجانی نہ ہو تو طارق فتح جیسے ناسور کی حمایت ناممکن ہے۔
پیپلز پارٹی جس نظریے پر ایک سیاسی قوت بنی تھی چونکہ وہ نہیں رہا تو اب آدھے رہنما PTM کی سوچ کے حامی ہیں، کچھ جئے سندہ کو آئیڈیلائز کر رہے ہیں اور کچھ کو سمجھ نہیں آ رہی کرنا کیا ہے، فرحت اللہ بابر بھی ہیجانی دماغی کیفیت کا شکار ہیں ورنہ طارق فتح جیسے ناسور کی حمائیت ناممکن ہے https://t.co/ApHVruzd3V
— Ch Fawad Hussain (@fawadchaudhry) September 30, 2019
یاد رہے کہ اس سے قبل پاکستان تحریک انصاف کے رہنما ہمایوں اختر خان کہہ چکے ہیں کہ مستقبل میں اپوزیشن کی طرف سے کوئی مارچ یا دھرنا نظر نہیں آتا۔ اپوزیشن صرف اپنے مفادات کا تحفظ چاہتی ہے جس کے لیے عوام کو دلدل میں دھکیلا جا رہا ہے۔
پی ٹی آئی رہنما ہمایوں اختر خان نے کہا کہ حالات بہت مشکل اور مسائل بہت پیچیدہ تھے، اس کے باوجود پی ٹی آئی حکومت نے کامیابیاں حاصل کیں اور وزیر اعظم عمران خان کی قیادت میں اپوزیشن جماعتوں کو اپنی بقاء خطرے میں پڑتی دکھائی دے رہی ہے۔
مزید پڑھیں: اپوزیشن کی طرف سے مستقبل میں کوئی مارچ یا دھرنا نظر نہیں آتا۔ہمایوں اختر خان