کراچی: ملک میں سونے کی فی تولہ قیمت میں ایک بار پھر بڑا اضافہ ہوا، جس کے سبب فی تولہ سونے کی قیمت 2لاکھ تک پہنچ گئی۔
ذرائع کے مطابق آج کاروباری روز کے دوران 24 قیراط سونے کی قیمت میں بڑا اضافہ دیکھنے کو ملا، جس کے بعد فی تولہ سونا 4 ہزار 400 روپے اضافے سے 2 لاکھ روپے پر پہنچ گیا ہے۔
میڈیا رپورٹس میں بتایا گیا ہے کہ 10 گرام سونے کی قیمت 3 ہزار 750 روپے بڑھ کر ایک لاکھ 71 ہزار 470 روپے ہوگئی ہے۔
عالمی مارکیٹ میں سونے کی قیمت میں اضافے کا رجحان رہا، جو ایک ہزار 849 ڈالر فی اونس پر پہنچ گیا ہے۔
دوسری جانب بینچ مارک کے ایس ای 100انڈیکس میں آج کاروباری روز کے دوران 228 پوائنٹس کا اضافہ ہوا، جبکہ امریکی ڈالر کے مقابلے میں روپیہ مستحکم رہا۔
کاروباری روز کے آغاز کے موقع پر کے ایس ای 100انڈیکس منفی زون میں چلا گیا، جو کاروبار کے اختتام کے موقع پر کم ترین سطح 47,217.74 تک پہنچ گیا۔ تاہم، بعد میں خریدوفروخت نے انڈیکس کو مثبت زون میں دھکیل دیا۔
کاروباری روز کے اختتام پر بینچ مارک انڈیکس 228.23 پوائنٹس کے اضافے کے ساتھ 47,721.80 پر بند ہوا، جبکہ جمعہ کو، انڈیکس میں 41.19 پوائنٹس کا اضافہ دیکھنے کو ملا تھا۔