گوگل نیوز پر ہمیں فالو کریںاسلام آباد انٹرنیشنل ایئرپورٹ پر پہلی پوسٹ حج پرواز PK-732 جدہ سے پہنچی، جس میں تقریباً 307 حاجی وطن واپس آئے۔ وفاقی وزیر پارلیمانی امور ڈاکٹر طارق فضل چوہدری نے ایئرپورٹ پر حاجیوں کا استقبال کیا۔
وفاقی وزیر نے میڈیا سے گفتگو میں کہا کہ حاجی اپنے حج کے انتظامات سے مطمئن ہیں اور وزارت مذہبی امور اور حکومت پاکستان کی فراہم کردہ سہولیات کو سراہا ہے۔ انہوں نے بتایا کہ مجموعی طور پر حج آپریشن میں 111 پروازیں شامل تھیں اور سعودی حکومت کی جانب سے بھی حاجیوں کو بہترین خدمات فراہم کی گئیں۔
ڈاکٹر طارق فضل چوہدری نے کہا کہ حکومت پاکستان نے حج کے دوران بہترین انتظامات کیے اور آئندہ سال مزید بہتر سہولیات دینے کی کوشش کی جائے گی۔ انہوں نے حاجیوں کی دعاؤں کو ملک کی داخلی سلامتی اور بھارت کے خلاف سیکورٹی کامیابی میں مؤثر قرار دیا۔
اسلام آباد ایئرپورٹ کے مینیجر آفتاب گیلانی نے بتایا کہ پوسٹ حج آپریشن 10 جولائی تک جاری رہے گا اور مدینہ سے اسلام آباد واپسی کی پروازیں ایک ہفتے بعد شروع ہوں گی۔ دوران پوسٹ حج تقریباً 30,000 حاجی اسلام آباد واپس لوٹنے کی توقع ہے۔
