اسلام آباد: معاونِ خصوصی اطلاعات ڈاکٹر فردوس عاشق اعوان نے آزاد کشمیر میں آنے والے زلزلے سے متاثرہ افراد اور ان کے اہل خانہ سے ملاقات کے لیے آزاد کشمیر کا دورہ کیا اور جاں بحق افراد کی وفات پر لواحقین سے تعزیت اور فاتحہ خوانی کی۔
سماجی رابطے کی ویب سائٹ ٹوئٹر پر اپنے دورۂ آزاد کشمیر کے حوالے سے اپنے پیغام میں فردوس عاشق اعوان نے کہا کہ وزیر اعظم عمران خان زلزلہ متاثرین کی تمام ممکنہ معاونت اور بحالی کے لیے پر عزم ہیں۔ میں ان کی ہدایت پر زلزلہ متاثرین کے گھر گئی۔
؎یہ بھی پڑھیں: آرمی چیف جنرل قمر جاوید باجوہ سے عالمی اسلامک بینک کے سربراہ کی ملاقات
فردوس عاشق اعوان نے کہا کہ میں نے زلزلے سے جاں بحق افراد کے لیے فاتحہ خوانی اور دُعا کی جبکہ عوام میں خیموں اور پانی سمیت دیگر ضروریاتِ زندگی کی اشیاء تقسیم کیں۔ ہم آزمائش کی اِس گھڑی میں زلزلہ متاثرین کے ساتھ ہیں۔
وزیراعظم عمران خان زلزلہ متاثرین کی تمام ممکنہ معاونت اوربحالی کےلیے پرعزم ہیں انکی ہدایت پر زلزلہ سے متاثرہ خاندانوںکے گھر گئی،ان کے پیاروں کے غم پران سے تعزیت اورفاتحہ خوانی کی۔خیموں اور پانی سمیت دیگراشیائے ضروریہ عوام میں تقسیم کیں۔آزمائش اورغم کی گھڑی میں متاثرین کے ساتھ ہیں pic.twitter.com/AlHCfLi9Qm
— Firdous Ashiq Awan (@Dr_FirdousPTI) September 26, 2019
یاد رہے کہ اس سے قبل آزاد کشمیر میں زلزلے کے جھٹکوں کے باعث متعدد مکانات زمیں بوس ہو گئے جس کے نتیجے میں زیادہ تر خواتین سمیت 50 افراد زخمی ہو چکے ہیں۔ میر پور کے ساتھ ساتھ پنجاب کے شہر جہلم اور ظفر وال کے علاوہ گردونواح میں بھی آفٹر شوکس محسوس کیے گئے۔
میر پور آزاد کشمیر کے علاوہ پنجاب کے مختلف شہروں میں زلزلوں کے جھٹکوں کے باعث لوگوں میں خوف و ہراس پھیل گیا۔ عوام اپنے گھروں، دفاتر اور دیگر عمارتوں سے باہر آنے پر مجبور ہو گئے۔
مزید پڑھیں: آزاد کشمیر میں زلزلے کے جھٹکوں سے متعدد مکانات زمیں بوس، 50 افراد زخمی