گوگل نیوز پر ہمیں فالو کریںکراچی: پولیس نے ایک حیران کن کارروائی کے دوران باپ بیٹی کو اسٹریٹ کرائم اور موٹرسائیکل چھیننے کے متعدد واقعات میں ملوث ہونے پر گرفتار کر لیا ہے۔
نیو کراچی پولیس کے مطابق ملزمان بلال اور اس کی 16 سالہ بیٹی شمائلہ کو ایک ہدفی کارروائی کے دوران گرفتار کیا گیا جس میں سی سی ٹی وی فوٹیج کی مدد سے دونوں کو 14 اپریل کو سیکٹر 11 ایل میں ایک شہری نعمان سے اسلحے کے زور پر موٹرسائیکل چھینتے ہوئے دیکھا گیا۔
نیو کراچی تھانے کے ایس ایچ او فیض الحسن کے مطابق گرفتار ملزمان کے قبضے سے چھینی گئی موٹرسائیکل، اسلحہ اور منشیات برآمد ہوئی ہیں۔ ملزمان کے خلاف ایف آئی آر نمبر 214/2025 کے تحت مقدمہ درج کر لیا گیا ہے۔
ایس ایچ او نے انکشاف کیا کہ بلال نے گرفتاری سے بچنے اور شک سے محفوظ رہنے کے لیے اپنی بیٹی کو جرائم میں شریک کیا۔ ابتدائی تفتیش کے دوران بلال نے اعتراف کیا کہ وہ کم از کم چار وارداتوں میں اپنی بیٹی کے ساتھ ملوث رہا ہے۔
پولیس کے مطابق بلال کا سالا، فہیم بھی اس گروہ کا حصہ ہے، جو اس وقت مفرور ہے۔ فہیم کے خلاف مختلف تھانوں میں متعدد مقدمات درج ہیں اور پولیس اس کی گرفتاری کے لیے چھاپے مار رہی ہے۔
یہ واقعہ نہ صرف قانون نافذ کرنے والے اداروں بلکہ عوام کے لیے بھی تشویش کا باعث بن گیا ہے کیونکہ اس میں یہ خطرناک رجحان سامنے آیا ہے کہ مجرم نوعمر بچوں کو قانونی سقم کا فائدہ اٹھانے کے لیے جرائم میں ملوث کر رہے ہیں۔
