گوگل نیوز پر ہمیں فالو کریںکراچی: وزیرِ اعلیٰ سندھ سیّد مراد علی شاہ نے کراچی کے 3 بڑے ہسپتالوں کا انتظام سنبھالنے کیلئے وفاق سے بات چیت کا فیصلہ کر لیا ہے۔
تفصیلات کے مطابق وزیرِ اعلیٰ سندھ مراد علی شاہ کی زیرِ صدارت کراچی کے ہسپتالوں کے حوالے سے گزشتہ روز ایک اہم اجلاس ہوا۔اجلاس میں قومی ادارہ برائے امراضِ قلب، ادارہ برائے صحتِ اطفال اور جناح ہسپتال کے معاملات پر گفتگو ہوئی۔
دورانِ اجلاس وفاقی حکومت کی جانب سے 3 ہسپتالوں کو بورڈ آف گورنرز کے ذریعے چلانے کو عدلیہ کے فیصلے کے خلاف قرار دے دیا گیا۔ وزیرِ اعلیٰ سندھ مراد علی شاہ نے گفتگو کرتے ہوئے کہا کہ سندھ حکومت نے ہسپتالوں پر بڑی محنت کی ہے۔
گفتگو کے دوران وزیرِ اعلیٰ سندھ نے کہا کہ ہمارے پاس ہسپتال چلانے کیلئے بہترین منصوبہ ہے۔ اگر وفاق ان ہسپتالوں کا کنٹرول سنبھالے تو علاج کی جاری سہولیات متاثر ہونے کا خدشہ ہے۔ ہسپتالوں پر پی ٹی آئی کی وفاقی حکومت سے بات چیت کریں گے۔
وزیرِ اعلیٰ سندھ کے ترجمان کا کہنا ہے کہ سن 2011ء سے اب تک تینوں ہسپتالوں کے تمام اخراجات سندھ حکومت برداشت کرتی آئی ہے۔ بلوچستان، پنجاب، خیبر پختونخوا اور اندرونِ سندھ سے بھی علاج کی غرض سے مریض یہاں آتے ہیں۔
یہ بھی پڑھیں: عالمگیرخان نے وزیرِ اعلیٰ سندھ کی تصویرکچرے کے ڈھیرپرلگادی
