گوگل نیوز پر ہمیں فالو کریںپاکستان تحریک انصاف (پی ٹی آئی) کی رہنما صنم جاوید نے شوہر سے ازدواجی تعلق ختم کرنے کے لیے فیملی کورٹ میں خلع کا دعویٰ دائر کردیا ہے۔ درخواست میں انہوں نے موقف اختیار کیا ہے کہ شوہر کے ساتھ ذہنی ہم آہنگی نہ ہونے کے باعث ازدواجی زندگی میں متعدد مسائل پیدا ہوچکے ہیں اور اب وہ مزید اس رشتے کو برقرار نہیں رکھنا چاہتیں۔
اطلاعات کے مطابق صنم جاوید نے اپنی وکیل بیرسٹر خدیجہ صدیقی کے توسط سے عدالت میں خلع کی درخواست جمع کروائی ہے۔
بیرسٹر خدیجہ صدیقی نے سماجی رابطے کی ویب سائٹ ایکس پر جاری بیان میں بھی درخواست دائر کیے جانے کی تصدیق کی۔ ان کا کہنا تھا کہ یہ صنم جاوید کا ذاتی اور خاندانی معاملہ ہے، اس لیے ان کی نجی زندگی اور رازداری کا احترام کیا جانا چاہیے۔
ہم نے صنم جاوید خان کی جانب سے عدالت میں خلع کا دعویٰ دائر کر دیا ہے۔ یہ اس کا ذاتی معاملہ ہے، اس لیے تمام ذرائع ابلاغ اور مبصرین سے گزارش ہے کہ اس پر قیاس آرائیوں سے گریز کریں۔
@sanamkh22 @22muradkhan https://t.co/EjafGF5l5W— khadija siddiqi (@khadijasid751) November 7, 2026
انہوں نے صحافیوں، الیکٹرانک و ڈیجیٹل میڈیا سے وابستہ افراد اور سوشل میڈیا صارفین سے اپیل کی کہ وہ غیر مصدقہ اطلاعات، ذاتی تبصروں اور قیاس آرائیوں سے گریز کریں تاکہ معاملے کی حساسیت اور صنم جاوید کی پرائیویسی متاثر نہ ہو۔
دوسری جانب درخواست دائر ہونے کے بعد فیملی کورٹ کی جانب سے ابتدائی نوٹس جاری کیے جانے کی اطلاع ہے، جبکہ فریقین کو آئندہ سماعت پر طلب کرنے کے لیے قانونی کارروائی شروع کردی گئی ہے تاحال صنم جاوید کی جانب سے اس معاملے پر کوئی تفصیلی عوامی بیان سامنے نہیں آیا۔
