گوگل نیوز پر ہمیں فالو کریںحیدرآباد کے علاقے علمدار چوک سے اولڈ نیشنل ہائی وے تک جانے والی سڑک کا ایک انوکھا منظر سوشل میڈیا پر بحث کا موضوع بن گیا ہے۔ سڑک کے بالکل درمیان میں کھڑے بجلی کے کھمبوں کی ویڈیو وائرل ہونے کے بعد شہریوں کی جانب سے محکمہ جاتی کارکردگی اور انجینئرنگ کے معیار پر شدید تنقید کی جا رہی ہے۔
وائرل ہونے والی کلپس میں دیکھا جا سکتا ہے کہ کارپٹنگ یا تعمیر کے مراحل سے گزرنے والی اس شاہراہ کے عین وسط میں بجلی کے کھمبے موجود ہیں جو نہ صرف ٹریفک کی روانی کے لیے خطرہ ہیں بلکہ راہگیروں کے لیے بھی شدید حیرت کا باعث بنے ہوئے ہیں۔ عوام سوال اٹھا رہے ہیں کہ کیا سڑک بناتے وقت متعلقہ اداروں کو کھمبے ہٹانے کا ہوش ہی نہیں رہا؟
روڈ کیسے بنائے جاتے ہیں یہ کوئی سندھ گورنمنٹ سے سیکھے
جیے بھٹو۔ https://t.co/hCN55NVH0D— Kamalkhan (@Kkinsafian) October 27, 2026
سوشل میڈیا پر صارفین کی جانب سے اس صورتحال پر طنز کے تیر چلائے جا رہے ہیں۔ ایک صارف نے کمنٹ کیا کہ روڈ کیسے بنائے جاتے ہیں، یہ ہنر کوئی سندھ حکومت سے سیکھے۔
ایک اور صارف کا کہنا تھا کہ پہلے کھمبے ہٹا کر سڑک بنانی چاہیے تھی اب جب کھمبے ہٹائے جائیں گے تو اس نئی سڑک کو دوبارہ کاٹ کر کھڈے کر دیے جائیں گے۔
شہریوں نے پُرزور مطالبہ کیا ہے کہ ترقیاتی کاموں کے دوران بنیادی ڈھانچے کی منتقلی کو اولین ترجیح دی جانی چاہیے تاکہ کسی بھی ناگہانی حادثے سے بچا جا سکے۔
میئر حیدرآباد کے ترجمان کی وضاحت
عوامی تنقید کے بعد ترجمان میئر حیدرآباد نے معاملے پر وضاحت پیش کرتے ہوئے انکشاف کیا ہے کہ علمدار چوک سے اولڈ نیشنل ہائی وے تک کا یہ پراجیکٹ ابھی تک زیرِ تعمیر ہے اور اس کی تکمیل کا عمل جاری ہے۔
حیدرآباد: زیرِ تعمیر سڑک پر بجلی کے کھمبے موجود ہونے کی ویڈیو وائرل
سڑک بنا دی، کھمبے ہٹانا بھول گئے؟ سوشل میڈیا پر گردش کرتی ویڈیو پر مئیر حیدرآباد کے ترجمان کی وضاحت
علمدار چوک تا اولڈ نیشنل ہائی وے سڑک تاحال زیرِ تعمیر ہے، ترجمان میئر
منصوبے کے تحت 162 بجلی کے کھمبے منتقل کیے جانے ہیں، ترجمان میئر
27 میں سے 10 بجلی کے فیڈرز منتقل کیے جا چکے ہیں، ترجمان میئر
سڑک کی تعمیر مکمل ہونے اور افتتاح تک عوام آمدورفت کے لیے استعمال نہ کریں، ترجمان میئر
— Ghazanfar Abbas (@ghazanfarabbass) October 28, 2026
ترجمان کے مطابق اس منصوبے کے تحت کل 162 بجلی کے کھمبے منتقل کیے جانے ہیں جن میں سے اب تک 27 میں سے 10 بجلی کے فیڈرز کی منتقلی کا کام کامیابی سے مکمل کیا جا چکا ہے۔ ترجمان نے شہریوں سے اپیل کی ہے کہ سڑک کا تعمیراتی کام مکمل ہونے اور اس کا باضابطہ افتتاح ہونے تک اس شاہراہ کو آمدورفت یا سفر کے لیے استعمال نہ کیا جائے۔
