مفتی تقی عثمانی کاقرآن پاک کی بے حرمتی کا معاملہ عالمی سطح پر اٹھانے کا مطالبہ

ناروے میں قرآن پاک کی بےحرمتی کے واقعے پرشدید ردعمل دیتے ہوئے ممتازعالم دین مفتی تقی عثمانی نےحکومت سے معاملہ عالمی سطح پراٹھانے اور نوجوان الیاس کو رہا کرنے کامطالبہ کیا ہے۔

سماجی رابطے کی ویب سائٹ ٹوئٹر پراپنے پیغا م میں مفتی تقی عثمانی کاکہنا تھا کہ مسلمانوں کو رواداری کا درس دینے والی مغربی دنیا قرآن کریم کے ساتھ بزدلی اور کمینگی کی انتہا پر پہنچ چکی ہے کہ اس کی بے حرمتی کے لئے باقاعدہ تقریب منائی جارہی ہے۔

انہوں نے قرآن پاک کی بے حرمتی روکنے والے نوجوان الیاس کو سراہتے ہوئے کہا کہ آفرین ہے اس جوان پر جس نے اس کمینگی کا عملی جواب دیا، افسوس ہے کہ نہ میڈیا نے اسے اہمیت دی نہ ترکی کے سوا کسی مسلم ملک نے۔

یہ بھی پڑھیں: ناروے میں قرآن کی بے حرمتی کے واقعے پر عالمی برادری کی شدید مذمت

مفتی تقی عثمانی کا کہنا تھا کہ اس اسلام دشمن اور ذلیل اقدام کی خبر پھیلنے میں بھی دیر لگی، مسلمان حکومتوں کا فرض ہے کہ وہ اس کے خلاف عالمی سطح پر قدم اٹھائیں اور اس نوجوان کو رہا کرائیں جس نے مسلمانوں کے دل جیتے ہیں۔