کے الیکٹرک پلانٹ میں فنی خرابی، کراچی میں لوڈشیڈنگ بڑھ سکتی ہے

کراچی کو بجلی سپلائی کرنے والی کمپنی کے الیکٹرک کے پلانٹ میں فنی خرابی سامنے آگئی، فنی خرابی کے باعث شہر میں لوڈشیڈنگ مزید بڑھ سکتی ہے۔

ترجمان کے الیکٹرک کی جانب سے بن قاسم پاور پلانٹ میں فنی خرابی کی تصدیق کر دی گئی ہے۔

گزشتہ روز کے الیکٹرک کا بن قاسم پاور یونٹ اسٹیشن ٹیسٹ رن پر ہی خراب ہو گیا تھا، کےالیکٹرک نے پلانٹ فنی خرابی کے باعث بند ہونے کی تصدیق بھی کی تھی۔

پلانٹ پر صورتحال کا مستقل جائزہ لیا جارہا ہے اور بین الاقوامی ماہرین پر مشتمل ٹیم درستگی یقینی بنائے گی۔

ترجمان  کے مطابق فالٹ گیس ٹربائن کے ایک خاص حصہ میں آیا ہے۔

ترجمان کے الیکٹرک نے دعویٰ کیا  کہ بجلی کی سپلائی 30 جون کے شیڈول کے مطابق ہے اور لوڈشیڈنگ میں اضافہ نہیں کیا گیا ہے۔