گوگل نیوز پر ہمیں فالو کریںٹرین آتشزدگی واقعے کے عینی شاہدین کا کہنا ہے کہ یہ افسوسناک حادثہ سلنڈر پھٹنے کے باعث نہیں ہوا ، تاہم عین ممکن ہے کہ آگ شارٹ سرکٹ کے باعث لگی ہو۔
واقعے کے عینی شاہدین کے مطابق تیز گام نامی ٹرین میں آگ سب سے پہلے ائیر کنڈیشنڈ بوگی میں لگی جہاں سلنڈر لے کر جانے کی کسی کو اجازت نہیں جبکہ آگ لگنے یا کسی چیز کے جلنے کی بو گزشتہ شب سے آ رہی تھی۔
یہ بھی پڑھیں: ٹرین آتشزدگی: وزیر اعظم عمران خان نے حادثے کی ہنگامی تحقیقات کا حکم دے دیا
عینی شاہدین کا کہنا تھا کہ تیز گام ٹرین میں آگ لگنے سے 100 سے زائد افراد کے جھلس کر جاں بحق ہونے کا افسوسناک واقعہ سلنڈر پھٹ جانے کے باعث پیش آنے کا تاثر درست نہیں لگتا، بلکہ آگ شارٹ سرکٹ کے باعث لگی۔
یاد رہے کہ اس سے قبل وفاقی وزیر ریلوے شیخ رشید احمد نے ٹرین حادثے کی ذمہ داری مسافروں پر عائد کرتے ہوئے تیز گام آتشزدگی کو مسافروں کی غلطی قرار دے دیا۔
راولپنڈی میں میڈیا سے گفتگو کرتے ہوئے شیخ رشید احمد نے کہا کہ ٹرین کی 3 بوگیاں آتشزدگی سے متاثر ہوئی ہیں جبکہ دینی اجتماع میں جانے والے لوگ ان پر سوار تھے۔
وزیر ریلوے شیخ رشید احمد نے کہا کہ آتشزدگی سلنڈروں کے باعث ہوئی ۔مسافروں کے 2 سلنڈر پھٹ گئے جس کے نتیجے میں بوگیوں میں آگ لگی۔
مزید پڑھیں: وزیر ریلوے شیخ رشید نے ٹرین آتشزدگی کی ذمہ داری مسافروں پر ڈال دی
