گوگل نیوز پر ہمیں فالو کریںلاہور: پاکستان تحریک انصاف کے مرکزی رہنماؤں اسد عمر اور فواد چوہدری کا کہنا ہے کہ الیکشن ملتوی کرنے کے فیصلے کو کل سپریم کورٹ میں چیلنج کریں گے، کل رات الیکشن کمیشن کے فیصلے نے آئین کی دھجیاں اڑا کر رکھ دیں۔
پی ٹی آئی رہنماء اسد عمر نے میڈیا سے بات کرتے ہوئے کہا کہ اجلاس میں فیصلہ کیا گیا ہے الیکشن کمیشن کے فیصلے کو چیلنج کیا جائے گا،پارلیمنٹ میں خواہش کا اظہار کیا گیا، حسن اتفاق ہے چند گھنٹے بعد الیکشن کمیشن کا فیصلہ آگیا، یہ فیصلہ آئینی و قانونی نہیں ہے۔
اسدعمر نے کہا کہ گورنر خیبرپختونخوا کے خلاف توہین عدالت کا مقدمہ پہلے ہی دائر کر چکے ہیں،کل ہی سپریم کورٹ میں پٹیشن دائر کر دی جائے گی، علی ظفر پٹیشن تیار کر رہے ہیں۔
انہوں نے کہا کہ آئین کے دفاع کے لیے سپریم کورٹ کے ساتھ اظہار یکجہتی بھی کیا جائے گا، آئین کے دفاع کے لیے سپریم کورٹ کے پیچھے کھڑے ہیں۔پنجاب کا الیکشن 30 اپریل کو کرایا جائے، لاہور ہائی کورٹ نے مینار پاکستان جلسے کی اجازت دیدی ہے، مینار پاکستان کا جلسہ تاریخی ہو گا۔
انہوں نے کہا کہ کاغذات نامزدگی جمع کرانے والے امیدوار حلقوں میں کمپین جاری رکھیں، پٹیشن میں مطالبہ کیا جائے گا کہ 30 اپریل کو ہی الیکشن کرایا جائے،اسد عمر نے کہا کہ جلسے کی تیاریوں کو تیز کر دیا ہے، پی ٹی آئی سینیٹرز پیر والے دن مشترکہ سیشن میں بھرپور طریقے سے موقف پیش کریں گے۔
فواد چودھری نے کہا کہ حمزہ شہباز کو بغیر پیش ہوئے اتوار والے دن ضمانت ملی تھی، وزیر قانون تو شیطان کے وکیل ہو گئے ہیں، اعظم نذیر تارڑ کو اپنا نام ڈیول ایڈووکیٹ ہی رکھ لینا چاہیے، اعظم نذیر تارڑ پہلے اچھے بھلے آدمی تھے۔
انہوں نے کہا کہ پی ٹی آئی کا جلسہ ہفتے کی رات کو ہو گا، جلسہ تروایح کے بعد شروع ہو گا اور سحری تک جاری رہے گا، انہوں نے کہا کہ پنجاب حکومت کا جے آئی ٹی بنانا خوش آئند فیصلہ ہے، ہم امید کرتے ہیں جے آئی ٹی آزادانہ ہو گی۔
سابق وزیر وفاقی نے کہا کہ 96 بار ایسوسی ایشنز نے الیکشن کمیشن کے فیصلے کو مسترد کیا ہے۔ یوم پاکستان کے دن آئین کو توڑا گیا، کل سپریم کورٹ میں پٹیشن دائر کر دی جائے گی۔
مزید پڑھیں:یومِ پاکستان یاد دلاتا ہے کہ انسان ناممکن کو ممکن کرسکتا ہے۔وزیر اعظم
فواد چوہدری نے کہا کہ کل مشترکہ اجلاس میں سپریم کورٹ پرحملہ کیا گیا، کل کا اجلاس ہی سپریم کورٹ پر حملہ کرنے کے لیے بلایا گیا تھا، عدلیہ پر حملہ کرنے کی مسلم لیگ کی ایک تاریخ ہے۔
