گوگل نیوز پر ہمیں فالو کریںاسلام آباد: وزیر اعظم شہباز شریف نے کہا کہ حکومت خواتین کے مساوی حقوق کو یقینی بنانے اور انہیں تعلیم اور ملازمتوں کے مواقع فراہم کرنے کے لیے اقدامات جاری رکھے گی۔
8 مارچ کو خواتین کے عالمی دن کے موقع پر اپنے ایک پیغام میں انہوں نے کہا کہ ’’آج دنیا بھر میں خواتین کا عالمی دن منایا جا رہا ہے ، اس دن میں اپنے ملک کی با صلاحیت خواتین سے وعدہ کرتا ہوں کہ ہماری حکومت خواتین کے مساوی حقوق، ان کے تحفظ اور تعلیم اور ترقی کے مساوی مواقع کی فراہمی کے لیے اقدامات کرتی رہے گی۔
انہوں نے کہا کہ آج کا دن خواتین کی سماجی، اقتصادی، ثقافتی اور سیاسی کامیابیوں کو تسلیم کرنے اور معاشرے کی تعمیر میں ان کے موثر کردار کے لیے یکساں مواقع فراہم کرنے کا ہے۔
انہوں نے مزید کہاکہ اس دن نے انسانی ارتقا میں خواتین کے تعمیری کردار کا اعتراف کیا اور “آج ہمیں معاشرے میں ان کے مقام کو بلند کرنے کا عہد کرنا ہے۔
وزیراعظم نے کہا کہ اسلام نے 14 صدیاں قبل خواتین کو مساوی حقوق دیے، خواتین کے قدموں تلے جنت تھی اور بیٹی کو گھر کی نعمت کہا جاتا تھا۔
انہوں نے کہا کہ آج کا دن مومنین کی ماؤں ، اسلام کی بنیاد بنانے میں اہم کردار ادا کرنے والی خواتین، محترمہ فاطمہ جناح کی سیاسی دانش، بیگم رعنا لیاقت علی خان کی قومی خدمات کو یاد کرنے کا دن ہے۔
جمہوریت کے لیے بے نظیر بھٹو شہید کی قربانی، جمہوریت کی بقا کے لیے محترمہ کلثوم نواز کی جدوجہد، محترمہ بلقیس ایدھی اور انسانیت کے زخموں پر مرہم رکھنے کے لیے اپنی زندگیاں وقف کرنے پر ڈاکٹر روتھ فاؤ، خواتین کی تعلیم کے لیے ملالہ یوسفزئی کی جرات اور تمام عظیم خواتین کی خدمات قابل تحسین ہیں۔
وزیراعظم نے کہا کہ تاریخ گواہ ہے کہ انسانی معاشرے خواتین کے تعمیری کردار کے بغیر ممکن نہیں۔ ہمیں نوجوان نسل کو خواتین کی کامیابیوں سے آگاہ کرنا ہے۔
