گوگل نیوز پر ہمیں فالو کریںوزیر اعلیٰ پنجاب عثمان بزدار نے کہا ہے کہ پاکستان تحریک انصاف کی بنیاد کرپشن کےخاتمے اور بے لاگ احتساب کے نعرے پر رکھی گئی ہے ، پنجاب اینٹی کرپشن نے پچھلے ایک سال میں 108 ارب روپے کی تاریخی ریکوری کی۔
سماجی رابطے کی ویب سائٹ ٹوئٹر پروزیر اعلیٰ پنجاب نے محکمہ انسداد کرپشن کی کارکردگی کے حوالے سے ایک پمفلٹ شیئر کیا جس میں انہوں نے کہا کہ اگست 19-2018 کے درمیانی عرصے میں مجموعی طور پر کرپشن سے متعلق 27 ہزار 127 شکایات موصول ہوئیں جس میں سے 26 ہزار 588 شکایات دور کی گئیں۔
پاکستان تحریک انصاف کی بنیاد کرپشن کے خاتمے اور بے لاگ احتساب کے نعرے پر رکھی گئی
پنجاب اینٹی کرپشن نےپچھلے ایک سال میں پنجاب بھر میں کرپشن کی 27,127 شکایات کوحل کیا اور 108 ارب روپےکی تاریخی ریکوری کی
احتساب کا یہ عمل مسلسل جاری رکھاجائےگا تاکہ عوام کا اداروں پر اعتماد بحال ہو pic.twitter.com/hxnAkXvn6l
— Usman Buzdar (@UsmanAKBuzdar) September 22, 2019
انہوں نے کہا کہ شکایت کنندہ کے خلاف کم از کم 5 ہزار 410 انکوائری کی گئیں اور8 ہزار 726 شکایات پر فیصلے جاری ہوئے، اے سی ای نے تحقیقات مکمل کرنے کے بعد 5 ہزار 410 مقدمات دائر کیے اور 2 ہزار 14 فیصلے جاری ہوئے۔
وزیراعلیٰ پنجاب نے مزید بتایا کہ محکمہ انسداد کرپشن کی جانب سے 1 ہزار 19 چالان جاری کیے، 280 چھاپے مارے گئے اور 1 ہزار 821 گرفتاریاں عمل میں لائی گئیں، گزشتہ ایک برس میں اے سی ای نے مفرور 40 مشتبہ افراد اور 257 ملزمان کو حراست میں لیا۔
واضح رہے کہ آج پنجاب حکومت نے ایک سالہ کارکردگی رپورٹ جاری کی تھی جس کے مطابق پنجاب حکومت نے تنخواہوں کے علاوہ دیگر اہم مراعات میں 60 فیصد کمی کی، وزیراعلیٰ پنجاب عثمان بزادر کے سیکیورٹی اخراجات پر سابقہ حکومت کی نسبت 66 فیصد کم خرچ ہوئے۔
رپورٹ میں دعویٰ کیا گیا ہے کہ سرکاری رہائشگاہوں کی سیکیورٹی پر 55 کروڑ روپے کی کمی کی گئی۔ تحائف اور مہمانداری کی مد میں 8 کروڑ روپے کی بچت کی گئی۔ اس کے علاوہ گاڑیوں کی مرمت کی مد میں 50 فیصد تک کمی کی گئی۔
