گوگل نیوز پر ہمیں فالو کریںلاہور:پاکستان کرکٹ بورڈ نے پیپسی کے تعاون سے ”وائس آف پاکستان کرکٹ 2022 ”مہم کا آغاز کردیا ہے۔اس مہم کے تحت پی سی بی ایچ بی ایل پی ایس ایل 7 کے دوران نئے کرکٹ کمنٹیٹرکی تلاش کا آغاز کرے گا۔
واضح رہے کہ اس سلسلے میں ڈیجیٹل مہم آج سے شروع ہوگی۔ کرکٹ کمنٹری میں پیشہ ورانہ کیرئیربنانے کے خواہشمند افراد اس مہم میں حصہ لے سکتے ہیں۔خواہشمند امیدواروں کو مہم میں شرکت کے لیے اپنی کرکٹ کمنٹری کی ویڈیو یہاں جمع کروانا ہوگی۔
اس مہم میں صرف اٹھارہ سال سے زائد عمر کے پاکستانی شہری ہی حصہ لے سکتے ہیں۔ امیدوار چاہے تو اردو یا انگریزی کسی بھی ایک زبان میں اپنی کرکٹ کمنٹری کی ویڈیو بناکر بھجوا سکتے ہیں۔
درخواستیں جمع کروانے والے 20 بہترین امیدواروں کے آڈیشنز خود چیئرمین پی سی بی رمیز راجہ کریں گے۔ ان 20 میں سے پانچ افراد کو فائنل راؤنڈ کے لیے شارٹ لسٹ کیا جائے گا، جن میں سے ایک کو پاکستان کرکٹ کی آواز برائے 2022 قرار دیا جائے گا۔
یہ ٹائٹل جیتنے والے کمنٹیٹر کو پانچ لاکھ روپے کے انعام سمیت ایچ بی ایل پی ایس ایل 7 کے فائنل میں کمنٹری کا موقع فراہم کیا جائے گا۔
رمیز راجہ، چیئرمین پی سی بی:
پاکستان کرکٹ بورڈ کے چیئرمین رمیز راجہ نے اس حوالے سے کہا ہے کہ پیپسی کے اشتراک سے پی سی بی کی جانب سے شروع کی جانے والی وائس آف پاکستان کرکٹ 2022 کی یہ مہم ایک بہترین اقدام ہے، جو کرکٹ کمنٹیٹر بننے کے خواہشمند شائقین کرکٹ کو آگے بڑھنے کا ایک بہترین موقع فراہم کررہی ہے۔
چیئرمین پی سی بی نے کہا کہ اس سے قبل پاکستان نے کبھی بھی اتنے وسیع پیمانے پر ایسی مہم کا آغاز نہیں کیا۔یقین ہے کہ پی سی بی اور پیپسی کے درمیان تعاون سیشروع ہونے والا ”وائس آف پاکستان کرکٹ 2022” دنیا بھر کے شائقین اور کمنٹیٹرزکی بھرپور توجہ حاصل کرے گا۔
مزید پڑھیں: ایچ بی ایل پی ایس ایل 7 کی مڈ سیزن ٹریڈ ونڈو کھول دی گئی
