گوگل نیوز پر ہمیں فالو کریںنارتھ کراچی میں منگل کی رات دیر گئے نامعلوم حملہ آوروں نے ایک وکیل اور اس کے دوست کو فائرنگ کرکے قتل کردیا۔ پولیس نے حملے کی وجہ معلوم کرنے کے لیے تحقیقات شروع کردی ہیں۔
پولیس اور اہلِ خانہ کے مطابق واقعہ سیکٹر 11 سی ٹو میں نومانیہ مسجد کے قریب، شیڈ اسپتال کے نزدیک، سر سید تھانے کی حدود میں پیش آیا۔ دونوں افراد موٹر سائیکل پر سفر کررہے تھے کہ حملہ آوروں نے ان پر فائرنگ کردی اور موقع سے فرار ہوگئے۔
پولیس کے مطابق دونوں زخمیوں کو ابتدائی طور پر تشویش ناک حالت میں عباسی شہید اسپتال منتقل کیا گیا۔ بعد میں انہیں اسٹیڈیم روڈ پر واقع ایک نجی اسپتال منتقل کیا گیا، جہاں دونوں زخموں کی تاب نہ لاتے ہوئے دم توڑ گئے۔
مقتولین کی شناخت 35 سالہ ہارون ولد شبیر اور 40 سالہ شکیل کے نام سے ہوئی ہے۔ ہارون سیکٹر 11 جی نیو کراچی کا رہائشی اور اسٹیٹ ایجنٹ تھا۔ وہ سرجانی ٹاؤن کی گودھرا سوسائٹی میں جائیداد کے کاروبار سے بھی وابستہ تھا۔
اہلِ خانہ کے مطابق ہارون شادی شدہ، صاحبِ اولاد اور اپنے گھر کا واحد کفیل تھا۔ جاں بحق ہونے والوں میں شامل شکیل وکیل تھا اور نارتھ کراچی کے سیکٹر 14 بی، انڈا موڑ میں روزی ہوٹل کے قریب رہتا تھا۔ وہ ایک بیٹی اور تین بیٹوں کا باپ تھا۔ پولیس کے مطابق شکیل ہارون کے جائیداد کے پلاٹوں کی خرید و فروخت سے متعلق قانونی معاملات بھی دیکھتا تھا۔
ابتدائی تحقیقات کے مطابق ہارون شکیل کو اپنے گھر لے جا رہا تھا کہ ایک اسپتال کے قریب اسپیڈ بریکر پر موٹر سائیکل کی رفتار کم ہوئی۔ مبینہ طور پر حملہ آوروں نے موٹر سائیکل کی کم رفتار کا فائدہ اٹھاتے ہوئے دونوں افراد پر فائرنگ کردی اور فرار ہوگئے۔ پولیس نے بتایا کہ جائے وقوعہ سے 9 ایم ایم پستول کے 5 خول بھی برآمد ہوئے ہیں۔
تفتیش کار مقتولین کے پیشہ ورانہ اور ذاتی معاملات سمیت مختلف پہلوؤں کا جائزہ لے رہے ہیں تاکہ معلوم کیا جاسکے کہ حملہ جائیداد کے تنازع، کاروباری معاملے یا کسی اور وجہ سے کیا گیا تھا۔ ضروری قانونی کارروائی مکمل ہونے کے بعد دونوں مقتولین کی لاشیں ان کے اہلِ خانہ کے حوالے کردی گئیں۔
