فلسطین میں اسرائیلی فورسز کی فائرنگ، الجزیرہ کی خاتون صحافی جاں بحق

مقبوضہ فلسطین میں اسرائیلی فورسز نے فائرنگ کرکے الجزیرہ کی خاتون صحافی کو قتل کردیا، جاں بحق صحافی مغربی کنارے میں اپنی ذمہ داریوں کی انجام دہی میں مصروف تھیں۔

تفصیلات کے مطابق اسرائیلی فورسز نے مغربی کنارے کے علاقے میں خاتون صحافی کو سر پر گولی مار کر ان کی جان لے لی۔ شیریں ابو عاقلہ کو قتل کرنے کی وجوہات معلوم نہیں ہوسکیں۔

الجزیرہ کی عربی سروس کی مشہورومعروف صحافی شیریں ابو عاقلہ کا شمار اہم میڈیا نمائندگان میں کیا جاتا تھا۔ تاحال اسرائیل کی جانب سے خاتون صحافی کے قتل پر کوئی ردِ عمل سامنے نہیں آیا۔

یہ بھی پڑھیں:

پاکستان کی بھارت میں اذان مخالف اقدامات کی شدید مذمت

عربی کے معروف چینل الجزیرہ اور فلسطینی وزارتِ صحت نے مغربی کنارے میں شیریں ابو عاقلہ کے قتل کی تصدیق کردی۔ وزارتِ صحت کے مطابق موت کی تصدیق ہسپتال میں ہوئی۔

الجزیرہ کا کہنا ہے کہ خاتون صحافی کو مغربی کنارے میں واقع شہر جینن میں بدھ کے روز گولی کا نشانہ بنایا گیا۔ زخمی حالت میں انہیں علاج کیلئے ہسپتال لے جایا گیا جہاں موت کی تصدیق ہوگئی۔

ساتھی صحافی کا بیان

خاتون صحافی کے قتل کے متعلق الجزیرہ میں ان کے ساتھ کام کرنے والے صحافی ابراہیم کا کہنا ہے کہ شیریں ابو عاقلہ جینن میں اسرائیلی مظالم بے نقاب کر رہی تھیں۔

ابراہیم نے رملا سے اپنے رقت آمیز بیان میں کہا کہ شیریں ابو عاقلہ کی موت ان کے ساتھ کام کرنے والے تمام صحافیوں کیلئے ایک بڑا صدمہ ہے۔ وہ ایک بہت قابلِ احترام صحافی تھیں۔

انہوں نے کہا کہ شیریں ابو عاقلہ الجزیرہ کے ساتھ سن 2000ء سے فلسطین میں دوسرے فلسطینی انتفادہ کے آغاز سے ہی کام کر رہی تھیں۔ اس اعتبار سے انہیں اس ادارے میں 22برس بیت چکے تھے۔