گوگل نیوز پر ہمیں فالو کریںصوبائی دارالحکومت کے علاقے دیر کالونی میں طوفانی بارشوں کے باعث نجی اسکول کی عمارت گرنے سے دلخراش المیہ رونما ہوا ہے جس کے نتیجے میں معصوم بچوں سمیت 21 افراد جان کی بازی ہار گئے۔
اطلاعات کے مطابق حادثہ عمارت کی خستہ حالی اور حالیہ موسلادھار بارشوں کے دباؤ کی وجہ سے پیش آیا۔ عینی شاہدین اور ابتدائی رپورٹس کے مطابق پہلے اسکول کا بالائی حصہ نیچے آیا اور دیکھتے ہی دیکھتے پوری عمارت زمین بوس ہو گئی جس کی وجہ سے طلبہ اور اساتذہ ملبے تلے دب گئے۔
لیڈی ریڈنگ اسپتال میں ایمرجنسی نافذ
لیڈی ریڈنگ اسپتال کے ترجمان محمد عاصم نے میڈیا کو بتایا کہ حادثے کے بعد اسپتال میں ایمرجنسی نافذ کر دی گئی ہے اور اب تک وہاں 21 لاشیں لائی جا چکی ہیں۔ جاں بحق ہونے والوں میں زیادہ تر کم عمر بچے (عمریں 13 سال تک) اور ایک خاتون معلمہ شامل ہیں جبکہ
17 زخمی بچوں کا بھی علاج جاری ہے جن میں سے متعدد کی حالت نازک بتائی جا رہی ہے جس سے اموات میں اضافے کا خدشہ بھی ظاہر کیا جا رہا ہے۔
ریسکیو آپریشن اور امدادی سرگرمیاں
حادثے کی اطلاع ملتے ہی ریسکیو 1122 کے اہلکار فوری طور پر حرکت میں آئے۔ ترجمان ریسکیو محمد بلال کے مطابق تقریباً 16 ایمبولینسیں اور بھاری مشینری موقع پر موجود ہیں۔ مقامی رضاکاروں اور انتظامیہ کی مدد سے ملبہ ہٹانے اور دبے ہوئے افراد کو باہر نکالنے کا ریسکیو آپریشن جاری ہے۔ اس اندوہناک واقعے کی وجہ سے پورے علاقے میں شدید سوگ اور خوف و ہراس کی فضا ہے۔
حکومت کا نوٹس
واقعے کی سنگین نوعیت کو دیکھتے ہوئے سیکریٹری تعلیم عنایت اللہ نے فوری نوٹس لے لیا ہے۔ انہوں نے پرائیویٹ اسکول ریگولیٹری اتھارٹی (پیسرا) کو فوری طور پر جائے وقوعہ کا دورہ کرکے تمام شواہد اکٹھے کرنے اور اس سانحے کی مکمل وجوہات پر مبنی رپورٹ جلد از جلد پیش کرنے کی سخت ہدایت کی ہے۔
