کراچی میں فی الفور صحت کی ایمرجنسی نافذ کی جائے، ڈاکٹر عمران علی شاہ

کراچی :پاکستان تحریک انصاف کے رکن سندھ اسمبلی و ماہر صحت ڈاکٹر عمران علی شاہ نے شہر قائد میں تیزی سے پھیلتی بیماریوں اور ان سے ہلاکتوں پر اظہار تشویش کرتے ہوئے کہا کہ شہر میں صرف ماہ نومبر کے 12 دنوں میں 2704 کیسز جبکہ رواں برس 12258 کیسز ڈینگی کے رپورٹ ہوئے۔

شہر میں کانگو وائرس سے 20،ڈینگی سے 34،ریبیز سے 22 افراد جان کی بازی ہار چکے ہیں جبکہ دماغ چاٹنے والے جرثومے نگلیریا سے صرف کراچی میں 16 ہلاکتیں رپورٹ ہوئی۔

صوبے میں ملیریا کے 60 ہزار اور ٹائیفائیڈ کے 10 ہزار سے زائد کیسز رپورٹ ہورہے ہیں۔ ڈاکٹر عمران شاہ نے کہا کہ شہر قائد کی غیر صحت مند آب و ہوا کی وجہ سے شہری قیمتی جانوں سے ہاتھ دھو رہے ہیں۔

میڈیا سیل کراچی سے جاری اپنے بیان میں ان کا مزید کہنا تھا کہ حکومت سندھ اور محکمہ صحت کی ازلی نااہلی کے باعث شہر کی آب و ہوا زہریلی ہوگئی ہے۔ پیپلز پارٹی کی ناکام حکومت نے تمام محکموں کو تباہ و برباد کر دیا۔

مزید پڑھیں :کراچی میں ڈینگی ایک اور زندگی نگل گیا، رواں برس مرنے والوں کی تعداد 34ہوگئی

پیپلز پارٹی نے گیارہ سالہ دورہ حکومت میں پہلے محکموں کو تباہ کیا، اب آب و ہوا کو بھی مضر صحت بنا دیا ہے۔ دنیا میں میگا میٹروپولیٹن سٹی پر ہمیشہ توجہ دے کر اسے ماڈل سٹی بنایا جاتا ہے، مگر سندھ حکومت نے اسے تباہ و برباد کردیا۔

روشنیوں کے شہر سے پہنچانے جانے والے شہر کی پہنچان ہی تبدیل کر دی گئی ہے۔ڈاکٹر عمران شاہ نے مزید کہا کہ محکمہ صحت نے شہر سے وائرس کے خاتمے اور اس سے بچاو کے تاحال اقدامت نہیں کیے۔

ڈاکٹر عمران شاہ نے حکومت سندھ سے مطالبہ کیا کہ شہر میں فی الفور صحت کی ایمرجنسی نافذ کرتے ہوئے اسپتالوں میں تمام امراض سے بچاو کی ویکسین فراہم کی جائے۔

شہر میں مچھر مار مہم اور واٹر بورڈ پانی میں کلورین کی مطلوبہ مقدار شامل کرنے کو لازمی قرار دیا جائے۔ جبکہ وزیر صحت سندھ ڈاکٹر عزرا پیچوہو سے مطالبہ کیا کہ سندھ میں بیماریوں کی بھرمار پر اور ناقص کارکردگی پر وزیر صحت فوری مستغفی ہوں۔