گوگل نیوز پر ہمیں فالو کریںاسرائیلی بمباری میں اسکول کو پناہ گاہ میں تبدیل کیے گئے مقام کو نشانہ بنایا گیا جس کے نتیجے میں 10 فلسطینی شہید ہو گئے جن میں ایک معصوم بچہ بھی شامل تھا جو سوتے ہوئے آگ کی لپیٹ میں آکر زندہ جل گیا، بچہ ملبے سے اس حالت میں برآمد ہوا کہ اس کی شناخت ممکن نہ رہی۔
قطر کے معروف نشریاتی ادارے الجزیرہ کے مطابق بچے اپنے خیموں میں نیند کی حالت میں جل رہے ہیں۔ یہاں کوئی محفوظ مقام باقی نہیں رہا اور اس نسل کشی میں کوئی بھی محفوظ نہیں۔ غزہ شہر اور اس کے شمالی علاقوں پر گھنٹوں سے شدید گولہ باری جاری ہے۔
دوسری جانب مغربی کنارے میں اسرائیلی افواج نے کم از کم 16 فلسطینیوں کو حراست میں لے لیا۔ ان گرفتار افراد میں حنان برغوثی بھی شامل ہیں جو اس سے قبل بھی قید رہ چکی ہیں۔
حنان، معروف فلسطینی قیدی نائل برغوثی کی بہن ہیں جنہوں نے اسرائیلی جیلوں میں 44 سال گزارے اور بعد ازاں مصر جلاوطن کر دیے گئے تھے۔ حنان نے گزشتہ برس بغیر کسی الزام کے 9 ماہ تک انتظامی حراست کا سامنا کیا۔
غزہ کے دیگر علاقوں میں بھی رہائشی علاقوں پر بمباری کی گئی جن میں جبالیا البلد کی پرانی غزہ اسٹریٹ اور الطفاح محلے کی النخیل اسٹریٹ شامل ہیں۔ ان حملوں کے نتیجے میں مزید جانی نقصان ہوا ہے۔
مزید اطلاعات کے مطابق، اسرائیلی افواج غزہ شہر کے مشرقی علاقوں اور رفح کے جنوبی حصے میں مکانات کو تباہ کر کے “سیکورٹی زونز” وسیع کر رہی ہیں۔ رفح کو باقی غزہ سے کاٹ کر مکمل محاصرے میں لے لیا گیا ہے تاکہ حماس کے خلاف مہم کو تیز کیا جا سکے۔
غزہ کی وزارت صحت کے مطابق، 7 اکتوبر 2023 سے اب تک اسرائیلی حملوں میں 51266 فلسطینی شہید اور 116991 زخمی ہو چکے ہیں۔
