پی ٹی آئی کارکنان کیخلاف کریک ڈاؤن ملک کو تباہی کی طرف لے جائے گا، اسد عمر

پشاور: پاکستان تحریک انصاف کے جنرل سیکریٹری اور سابق وزیر اسد عمر نے کہا کہ پارٹی کی قیادت کیخلاف کریک ڈاؤن سے مسلم لیگ (ن) کی حکومت کو ملک کو چلانے میں کوئی مدد نہیں ملے گی بلکہ اسے اور نقصانات ہونگے۔

تفصیلات کے مطابق پاکستان تحریک انصاف کے وائس چیئرمین شاہ محمود قریشی کے ہمراہ پریس کانفرنس کرتے ہوئے اسد عمرنے کہا کہ کل رات جو کچھ ہوا اُس نے ہمارے کارکنوں کا جوش و جذبہ مزید بڑھادیا ہے۔

انہوں نے پریس کانفرنس کے دوران انکشاف کیا کہ چھاپے صرف لاہور تک محدود نہیں تھے، انہوں نے الزام لگایا کہ سندھ، اسلام آباد اور راولپنڈی میں بھی قانون سازوں کو گرفتار کیا گیا۔

یہ بھی پڑھیں: ڈکٹیٹر اور ن لیگ کی حکومت میں کوئی فرق نہیں، عمران خان

پی ٹی آئی رہنما اسد عمر نے مزید کہا کہ پولیس نے ہماری ایم پی اے یاسمین راشد کو بھی لے جانے کی کوشش کی، جو کینسر کے مرض سے صحت یاب ہورہی ہیں۔

اس موقع پر سابق وزیرخارجہ شاہ محمود قریشی نے کہا کہ تمام پی ٹی آئی کے کارکنان اور رہنما سب انڈرگراؤنڈ ہوجائیں، نہیں تو اپنے رشتہ داروں کے گھر چلے جائیں۔ انہوں نے پارٹی کارکنوں سے کہا کہ پبلک ٹرانسپورٹ یا کوئی اور ذریعہ استعمال کریں اور اسلام آباد پہنچ جائیں۔

شاہ محمود قریشی نے کہا کہ اگر آپ کو اسلام آباد آنے کے دوران راستے میں رکاوٹیں ملتی ہیں تو ہر سڑک، ہر گلی اور ہر کونے کو سری نگر ہائی وے میں بدل دیں، انہوں نے ساتھ ہی یقین دہانی کرائی کہ جو کچھ بھی ہوجائے مارچ کا پروگرام وہی رہے گا جو پہلے تھا ۔

مزید برآں سابق وزیر خارجہ نے واضح کیا کہ ہماری پالیسی ایسی نہیں جو کہ تشدد یا تصادم کو فروغ دے، ہماری تمام سیاسی سرگرمیاں ہمیشہ پرامن رہی ہیں۔ ہم نے ریلیوں اور اجتماعات کا اہتمام کیا جس میں لاکھوں افراد نے شرکت کی لیکن ان میں سے کسی میں کبھی بھی تشدد یا تنازعہ کی اطلاع نہیں ملی۔

دونوں پی ٹی آئی رہنماؤں نے زور دیا کہ ملک میں افراتفری کا واحد حل نئے انتخابات ہیں۔ اگر آپ واقعی ملک کی پرواہ کرتے ہیں، تو آج ہی انتخابات کا اعلان کریں۔ کیونکہ ملک کے عوام نے فیصلہ کر لیا ہے کہ وہ غلامی یا کسی امپورٹڈ حکومت کو قبول نہیں کریں گے۔