اسلام آباد: وزیر اعظم کے معاونِ خصوصی برائے امورِ صحت ڈاکٹر ظفر مرزا نے تصدیق کی ہے کہ پاکستان میں کورونا وائرس سے متاثرہ افراد کی تعداد دُگنی ہو گئی ہے۔
سماجی رابطے کی ویب سائٹ ٹوئٹر پر گزشتہ روز اپنے پیغام میں معاونِ خصوصی ڈاکٹر ظفر مرزا نے کہا کہ گزشتہ 24 گھنٹوں (پیر اور منگل) کے دوران پاکستان میں کورونا وائرس کیسز کی تعداد دو گنا سے زیادہ ہو گئی ہے۔
کورونا وائرس سے خوفزدہ عوام کو تسلی دیتے ہوئے ڈاکٹر ظفر مرزا نے کہا کہ یہ صورتحال حیران کن نہیں ہے۔ یہ مرض اب تک سو سے زائد ممالک میں پھیل چکا ہے۔ اب تک 19 کیسز رپورٹ ہوئے۔
ڈاکٹر ظفر مرزا نے کہا کہ یہ تمام کیسز بیرونِ ملک سے پاکستان آئے۔ کورونا وائرس سے متاثرہ سب لوگوں کی صحت کی صورتحال مستحکم ہے جبکہ یہ وائرس مقامی طور پر نہیں پھیلا۔
معاونِ خصوصی نے کہا کہ اب تک اس بات کا کوئی ثبوت نہیں ملا کہ کورونا وائرس مقامی طور پر پھیلا ہو۔ اگر ہم ذمہ داری سے اپنا کردار ادا کریں تو ہم وائرس کے پھیلاؤ کو روک سکتے ہیں۔
243/ Cases in Pakistan have more than doubled in last 24 hours. This is not surprising. Disease has spread in 106 countries. All 19 cases have brought this from abroad. All are stable. There is no evidence of local spread as yet. If we act responsibly we can avoid spread.
— Zafar Mirza (@zfrmrza) March 10, 2020
یاد رہے کہ اس سے قبل دنیا بھر میں کورونا وائرس کے باعث مزید 271 افراد ہلاک ہو گئے جس کے نتیجے میں اب تک مجموعی اموات کی تعداد 4 ہزار 298 ہو گئی۔
کورونا وائرس کے باعث متاثر ہونے والے افراد کی تعداد میں بھی اضافہ ہو رہا ہے۔ موجودہ اعدادوشمار کے مطابق وائرس سے 1 لاکھ 19 ہزار سے زائد افراد متاثر ہوچکے ہیں۔
مزید پڑھیں: کورونا وائرس سے اموات کی تعداد 4 ہزار 298 ہو گئی