قومی احتساب بیورو(نیب) کےچیئرمین جسٹس(ر)جاوید اقبال کاکہناتھا کہ  نیب کا تعلق کسی فرد، گروہ یا جماعت سے نہیں ہے، بیورو کریسی کو نیب سے کوئی خطرہ نہیں اور نہ ہی ہونا چاہیے۔

چیئرمین نیب جسٹس(ر)جاوید اقبال نے  نیب خیبر پختونخوا کادورہ کیا اورنیب کی کارکردگی کاجائزہ لیا، اس موقع پر چیئرمین نیب نے کہا کہ میگا کرپشن کے وائٹ کالر مقدمات کو منطقی انجام تک پہنچانا نیب کی اولین ترجیح ہے،  تمام سیاستدانوں کا قانون کے مطابق احترام کرتے ہیں اور انہیں قدر کی نگاہ سے دیکھتے ہیں تاہم ملک سے بد عنوانی کا خاتمہ ہو گا تو ملک ترقی کرے گا۔

انہوں نےکہا کہ نیب نے گزشتہ 22 ماہ میں قوم کے لوٹے ہوئے 71 ارب روپے  برآمد کرکے قومی خزانے میں جمع کروادیئے،900 ارب مالیت کے حامل ایک ہزار 

210 بد عنوانی کے مقدمات احتساب عدالتوں میں دائر کیے جبکہ نیب خیبر پختونخواہ نے گزشتہ 22 ماہ میں 50 کروڑ روپے بلواسطہ اور بلاواسطہ برآمد کر کے قومی خزانے میں جمع کروائے۔

 جاویداقبال کاکہناتھا کہ نیب ملک سے بدعنوانی کے خاتمے اورلوٹی گئی رقوم کی واپسی کےلئےسنجیدہ کاوشیں کررہا ہے جبکہ پہلے سے جاری مقدمات کو فیڈرل بورڈ آف ریونیو (ایف بی آر) واپس بھیج دیا جائے گا۔

 انہوں نےمزید کہا کہ نیب خیبر پختونخوا نیب کی مجموعی کارکردگی میں اہم کردار ادا کررہا ہے اورمعتبر قومی اور بین الاقوامی اداروں نےادارےکو سراہا ہے جس سے اندازہ ہوتا ہے کہ نیب خیبر پختونخواکی کارکردگی اچھی رہی ہے۔

انہوں نے تاجر برادری کے حوالے سے بات کرتے ہوئے کہا کہ تاجر ملک کی ترقی و خوشحالی میں ریڑھ کی ہڈی کی حیثیت رکھتے ہیں اور ان کے احترام میں سیلز ٹیکس اور انکم ٹیکس کے مقدمات نہ لینے کا فیصلہ کیا گیا۔