کراچی میں تیز بارش، ضلع شرقی کی شاہراہیں کلیئر، ٹریفک کی روانی بحال

کراچی:ایڈمنسٹریٹر ڈی ایم سی ایسٹ شعیب احمد ملک، میونسپل کمشنر غلام سرور راہپوٹو کی سخت نگرانی ورہنمائی میں رات گئے تیز برسات کے باوجود تین سے چار گھنٹے میں ضلع شرقی کی شاہراہوں کو کلیئرکر کے ٹریفک کی روانی کو بحال کردیا گیا۔

سپرنٹنڈنگ انجینئرزمبین شیخ، سید اظہر شاہ اور ایگزیکٹیو انجینئرزامتیاز بھٹو، اقبال ملاح اور سلمان میمن ودیگر افسران نے اسوقت تک فرائض سر انجام دئیے جب تک شاہراہیں کلیئرنہ ہوئیں۔

ایڈمنسٹریٹر بلدیہ شرقی شعیب احمد ملک اور میونسپل کمشنر غلام سرور راہپوٹو نے رات گئے تواتر کے ساتھ دورے کرنے کے ساتھ نیپا، سفاری، اسٹیڈیم روڈ، شاہراہ قائدین، کشمیر روڈ پر اپنی نگرانی میں نکاسی آب کے امور کو یقینی بنوایا۔

مزید پڑھیں:کراچی میں بارش سے سڑکیں تالاب بن گئیں، سرکاری عملہ پانی نکالنے میں مصروف

ایگزیکٹیو انجینئرامتیاز بھٹو نے اس حوالے سے امتیازی کردار ادا کیا اور بروقت ڈی واٹرنگ پمپس کی فراہمی کو یقینی بنا کر شاہراہوں کو بروقت کلیئرکرنے میں اپنا کردار ادا کیا۔

ایڈمنسٹریٹر بلدیہ شرقی شعیب احمد ملک، میونسپل کمشنر غلام سرور راہپوٹو نے کہا ہے کہ برسات کے حوالے سے جاری رین ایمرجنسی میں اب تک بلدیہ شرقی کے افسران وعملے نے اپنی تمام تر صلاحیتوں اور قوتوں سے اپنا کردار ادا کیا۔

ان کا کہنا ہے کہ مزید برسات کی صورت میں بھی شہریوں کو ریلیف فراہم کرنے کیلئے اپنا کردار ادا کریں گے انہوں نے کہا کہ محکمہ میونسپل سروسز، پارکس اور ڈیبریز ریموول کے محکمہ جات بھی رین ایمرجنسی میں متحرک ہیں۔