سفید چادر سرخ ہوجائے مگر ہزارہ صوبہ پر سمجھوتہ ممکن نہیں! ارم فاطمہ ترک کا دوٹوک پیغام

تازہ ترین

تازہ ترین

(فوٹو؛ فائل)

مانسہرہ، بٹگرام، تورغر اور کوہستان سمیت ہزارہ ڈویژن کے نو اضلاع میں آباد لاکھوں افراد کا الگ صوبے کا مطالبہ ایک مرتبہ پھر توجہ کا مرکز بن گیا ہے۔ ہزارہ کے عوام طویل عرصے سے اپنی الگ انتظامی شناخت، سیاسی نمائندگی اور وسائل پر اختیارات کے لیے صوبہ ہزارہ کے قیام کا مطالبہ کرتے آرہے ہیں۔

اس مطالبے کو بھرپور انداز میں اجاگر کرنے والی شخصیات میں ارم فاطمہ ترک بھی شامل ہیں جنہیں ان کے حامی آئرن لیڈی آف ہزارہ کے نام سے یاد کرتے ہیں۔ ان کا کہنا ہے کہ ہزارہ کے عوام کے آئینی حقوق اور الگ صوبے کے مطالبے سے کسی صورت دستبردار نہیں ہوا جائے گا۔

ارم فاطمہ ترک نے اپنے عزم کا اظہار کرتے ہوئے کہا ہے کہ وہ اپنے مقصد کے لیے ہر قربانی دینے کو تیار ہیں، تاہم صوبہ ہزارہ اور یہاں کے عوام کے حقوق پر کوئی سمجھوتہ قبول نہیں کریں گی۔

صوبہ ہزارہ کا مطالبہ کیوں اہم ہے؟

ہزارہ ڈویژن اپنی منفرد ثقافتی، لسانی اور جغرافیائی شناخت رکھتا ہے۔ یہاں ہندکو بولنے والی اکثریتی آبادی کے علاوہ کوہستانی اور پشتون برادریاں بھی آباد ہیں۔ مقامی حلقوں کے مطابق اپریل 2010 میں صوبے کے نام کی تبدیلی کے بعد ہزارہ میں الگ صوبے کی تحریک نے مزید شدت اختیار کی، جبکہ 12 اپریل 2010 کو ایبٹ آباد میں پیش آنے والے المناک واقعات نے اس مطالبے کو نئی سیاسی اہمیت دی۔

صوبہ ہزارہ کے حامیوں کا مؤقف ہے کہ تربیلا اور داسو کے پن بجلی منصوبے، حطار انڈسٹریل اسٹیٹ، معدنی وسائل، کاغان اور گلیات کے سیاحتی مقامات اور شاہراہ قراقرم جیسے اہم منصوبے اس خطے کی معاشی اہمیت کو نمایاں کرتے ہیں۔

ان کے مطابق اتنے اہم وسائل اور معاشی امکانات کے باوجود ہزارہ کو انتظامی اختیارات، ترقیاتی منصوبوں، روزگار اور بنیادی سہولیات کے حوالے سے مزید توجہ کی ضرورت ہے۔

اسمبلی قراردادوں کے باوجود صوبے کا قیام تاحال زیر التوا

الگ صوبہ ہزارہ کے حامیوں کا کہنا ہے کہ خیبرپختونخوا اسمبلی میں اس حوالے سے مختلف ادوار میں قراردادیں منظور ہونے کے باوجود عملی پیش رفت سامنے نہیں آسکی۔ ان کے نزدیک نئے صوبے کا قیام انتظامی اختیارات کی منتقلی اور مقامی آبادی کو بہتر نمائندگی فراہم کرنے کا ذریعہ بن سکتا ہے۔

ارم فاطمہ ترک کی تین دہائیوں پر محیط سیاسی و سماجی جدوجہد

ارم فاطمہ ترک گزشتہ تقریباً 30 برس سے ہزارہ کے سیاسی اور سماجی معاملات میں سرگرم کردار ادا کر رہی ہیں۔ وہ ماضی میں عوامی نیشنل پارٹی کی مرکزی نائب صدر کے منصب پر بھی فائز رہیں تاہم ہزارہ کے حقوق کے معاملے پر اختلافات کے بعد انہوں نے پارٹی عہدہ چھوڑ دیا بعدازاں شہید بے نظیر بھٹو کے عوام دوست سیاسی منشور سے متاثر ہوکر پاکستان پیپلز پارٹی کے پلیٹ فارم سے اپنی سیاسی سرگرمیاں جاری رکھیں۔

ان کی سماجی جدوجہد میں بچوں کے تحفظ، متاثرہ خاندانوں کو انصاف کی فراہمی اور محنت کش طبقے کے مسائل نمایاں رہے ہیں۔ کم سن آیت نور کے قتل اور 13 سالہ عثمان علی کے کیس میں متاثرہ خاندانوں کی حمایت کے علاوہ انہوں نے بچوں کے تحفظ کے لیے سیف سٹی منصوبے اور مؤثر قانون سازی کی ضرورت پر بھی زور دیا۔

اسی طرح حطار انڈسٹریل اسٹیٹ میں گیس پائپ لائن دھماکے کے بعد متاثرہ مزدوروں اور ان کے خاندانوں کے مسائل اجاگر کرنے میں بھی انہوں نے کردار ادا کیا۔

ارم فاطمہ ترک نوجوانوں، بالخصوص نئی نسل کو اپنی ثقافتی شناخت برقرار رکھنے، سیاسی شعور حاصل کرنے اور آئینی حقوق کے لیے آواز بلند کرنے کی ترغیب دیتی ہیں۔

ہزارہ کے الگ صوبے کا مطالبہ اور ارم فاطمہ ترک کی سیاسی و سماجی جدوجہد اس خطے میں انتظامی خودمختاری، بہتر نمائندگی اور مقامی حقوق سے متعلق جاری بحث کا اہم حصہ ہیں۔ ان کے حامیوں کا کہنا ہے کہ ہزارہ کے عوام اب اپنے دیرینہ مطالبے پر عملی پیش رفت دیکھنا چاہتے ہیں۔

Related Posts