گوگل نیوز پر ہمیں فالو کریںراولپنڈی میں اڈیالہ روڈ کے علاقے گلشن آباد میں نجی ٹی وی چینل 92 نیوز کی خاتون اینکر ربیعہ احسن گھر میں مردہ پائی گئیں۔ ان کی لاش پر گولی لگنے کے نشانات ملنے کے بعد واقعے نے کئی سوالات کھڑے کر دیے ہیں جبکہ پولیس نے تحقیقات کے سلسلے میں ان کے شوہر احسن کو حراست میں لے لیا ہے۔
پولیس حکام کے مطابق واقعے کی اطلاع ملتے ہی متعلقہ پولیس ٹیمیں موقع پر پہنچ گئیں اور گھر کا معائنہ کرنے کے ساتھ شواہد بھی اکٹھے کیے۔ ابتدائی معلومات کے مطابق ربیعہ احسن کے جسم پر گولی لگنے کے نشانات پائے گئے ہیں تاہم ان کی موت کی اصل وجہ تاحال حتمی طور پر معلوم نہیں ہو سکی۔
پولیس نے واقعے کی نوعیت کے پیش نظر فرانزک ماہرین کو بھی تحقیقات میں شامل کرلیا ہے تاکہ جائے وقوعہ سے ملنے والے شواہد، فنگر پرنٹس اور دیگر تکنیکی معلومات کی مدد سے حقائق سامنے لائے جا سکیں۔
دوسری جانب مقتولہ کے شوہر احسن کو پولیس نے تحویل میں لے کر ابتدائی پوچھ گچھ شروع کردی ہے۔ پولیس کے مطابق شوہر نے اپنے ابتدائی بیان میں موقف اختیار کیا ہے کہ گولی جان بوجھ کر نہیں چلائی گئی بلکہ اچانک چل گئی۔ ان کا کہنا تھا کہ گھر میں ربیعہ کی والدہ اور بہن بھی موجود ہیں ان سے بھی واقعے کے بارے میں پوچھ گچھ کی جا سکتی ہے۔
راولپنڈی اڈیالہ روڈ گلشن آباد میں @92newschannel کی اینکر پرسن ربیعہ احسن گھر میں مردہ حالت میں پائی گئی، پولیس ذرائع کے مطابق ربیعہ احسن کے جسم پر بلیٹ کے نشانات پائے گئے، تاہم موت کی اصل وجوہات تاحال سامنے نہیں آئیں۔ https://t.co/HxPkh8DgYn
— Shabbir Dar (@ShabbirDar5) November 8, 2026
اطلاعات کے مطابق لاش کو قانونی کارروائی اور پوسٹ مارٹم کے لیے اسپتال منتقل کیا گیا ہے جس سے موت کے وقت اور اصل وجہ کا تعین کرنے میں مدد ملے گی۔
پولیس حکام کا کہنا ہے کہ واقعے کی مختلف پہلوؤں سے تفتیش جاری ہے اور تمام ممکنہ امکانات کا جائزہ لیا جا رہا ہے۔ حتمی نتیجہ فرانزک رپورٹ، پوسٹ مارٹم اور دیگر شواہد سامنے آنے کے بعد ہی اخذ کیا جا سکے گا۔
