گوگل نیوز پر ہمیں فالو کریںامریکا کے وسط مدتی انتخابات میں مسلمان امیدواروں نے نمایاں کامیابیاں حاصل کرتے ہوئے امریکی سیاست میں اپنی نمائندگی مزید مضبوط کر دی۔ الہان عمر سمیت 6 مسلمان امیدوار انتخابی میدان مارنے میں کامیاب ہوگئے جبکہ بھارتی نژاد نبیلہ سید نے ریاست الینوائے میں ریپبلکن امیدوار کو شکست دے کر اہم کامیابی حاصل کر لی۔
امریکی میڈیا کے مطابق نبیلہ سید نے ریپبلکن امیدوار ڈاربی ہلز کو شکست دے کر 57 فیصد ووٹ حاصل کیے، جبکہ ان کی حریف کو 43 فیصد ووٹ ملے۔ اس کامیابی کے بعد نبیلہ سید الینوائے کی ریاستی سینیٹ کی رکن منتخب ہوگئیں۔
نبیلہ سید نے اسمبلی سے سینیٹ تک کا سفر طے کر لیا
نبیلہ سید اس سے قبل 2022 میں الینوائے کی ریاستی اسمبلی کی پہلی مسلمان ارکان میں شامل ہوئی تھیں۔ ان کے والدین 1980 کی دہائی میں بھارتی شہر حیدرآباد سے امریکا منتقل ہوئے تھے۔
ان کی انتخابی مہم میں آرٹیفیشل انٹیلی جنس (اے آئی) سے متعلق ڈیٹا سینٹرز کا معاملہ بھی خاص اہمیت کا حامل رہا۔ نبیلہ سید کی کامیابی کو ریاستی سیاست میں ایک اہم پیش رفت قرار دیا جا رہا ہے۔
الہان عمر پانچویں بار کانگریس کی رکن منتخب
دوسری جانب ڈیموکریٹک رہنما اور امریکی کانگریس کی مسلمان رکن الہان عمر نے ریاست مینیسوٹا سے مسلسل پانچویں بار کامیابی حاصل کرلی۔ انہوں نے ریپبلکن امیدوار جان نیگل کو شکست دے کر ایوانِ نمائندگان میں اپنی نشست برقرار رکھی۔
الہان عمر کو انتخابی مہم کے دوران امیگریشن فراڈ سے متعلق تحقیقات اور سیاسی مخالفین کی تنقید کا سامنا بھی رہا تاہم وہ دوبارہ کامیابی حاصل کرنے میں کامیاب ہوگئیں۔ ان کا انتخابی حلقہ منیاپولس شہر اور اس کے نواحی علاقوں پر مشتمل ہے۔
آدم حماوی، رشیدہ طلیب اور آندرے کارسن بھی کامیاب
امریکی میڈیا کے مطابق نیوجرسی سے ڈیموکریٹ امیدوار آدم حماوی پہلی مرتبہ امریکی ایوانِ نمائندگان کے رکن منتخب ہوگئے۔
مشی گن سے رشیدہ طلیب اور انڈیانا سے آندرے کارسن بھی اپنی نشستیں برقرار رکھنے میں کامیاب رہے۔
اسی طرح کیلیفورنیا میں عائشہ وہاب نے 57 فیصد جبکہ لطیفہ سائمن نے 80 فیصد ووٹ حاصل کرکے کامیابی اپنے نام کی۔
امریکی سیاست میں مسلم نمائندگی کا نیا منظرنامہ
امریکی انتخابات میں مسلمان امیدواروں کی یہ کامیابیاں مختلف ریاستوں میں ان کی بڑھتی ہوئی سیاسی نمائندگی کو اجاگر کرتی ہیں۔ الہان عمر کی مسلسل پانچویں کامیابی، نبیلہ سید کا ریاستی سینیٹ تک پہنچنا اور دیگر امیدواروں کی فتوحات امریکی سیاست میں مسلم کمیونٹی کے بڑھتے ہوئے کردار کی عکاسی کرتی ہیں۔
