گوگل نیوز پر ہمیں فالو کریںعالمی منڈی میں نئے کاروباری ہفتے کے آغاز پر سونے کی قیمت میں معمولی اضافہ ریکارڈ کیا گیا جبکہ چاندی کی قیمت بھی بڑھ گئی۔ خام تیل کے نرخوں میں کمی سے مہنگائی کے خدشات میں کچھ نرمی آنے کے باعث سونے کو سہارا ملا تاہم سرمایہ کاروں کی توجہ امریکی مرکزی بینک کے آئندہ شرح سود کے فیصلے پر مرکوز ہے۔
عالمی مارکیٹ میں سونے کی اسپاٹ قیمت 0.4 فیصد اضافے کے بعد 4,009 ڈالر فی اونس ہوگئی۔ یہ نرخ پیر کو گرین وچ معیاری وقت کے مطابق صبح 3 بج کر 42 منٹ پر ریکارڈ کیے گئے۔
دوسری جانب دسمبر میں ترسیل کے لیے امریکی گولڈ فیوچرز کی قیمت بھی 0.4 فیصد بڑھ کر 4,023 ڈالر فی اونس تک پہنچ گئی۔
چاندی، پلاٹینم اور پیلیڈیم کے نرخ
قیمتی دھاتوں کی عالمی مارکیٹ میں چاندی کی قیمت میں بھی اضافہ دیکھا گیا۔ اسپاٹ سلور 0.6 فیصد مہنگی ہوکر 54.19 ڈالر فی اونس پر پہنچ گئی۔
اس کے برعکس پلاٹینم کی قیمت 1,551.31 ڈالر فی اونس پر مستحکم رہی جبکہ پیلیڈیم کے نرخ 0.6 فیصد اضافے کے بعد 1,050.50 ڈالر فی اونس ہوگئے۔
گزشتہ ہفتے سونے کی قیمت میں بڑی گراوٹ
واضح رہے کہ گزشتہ ہفتے جمعہ 23 اکتوبر کو ختم ہونے والے کاروباری ہفتے کے دوران سونے کی قیمت میں مجموعی طور پر 4 فیصد کمی ریکارڈ کی گئی تھی۔ یہ جون کے بعد کسی ایک ہفتے میں ہونے والی سب سے بڑی گراوٹ تھی۔
حالیہ اضافے کے باوجود سونے کی عالمی مارکیٹ میں سرمایہ کاروں کی توجہ امریکی فیڈرل ریزرو کی مانیٹری پالیسی اور مہنگائی سے متعلق اعداد و شمار پر برقرار ہے کیونکہ شرح سود سے متعلق فیصلے قیمتی دھاتوں کی قیمتوں پر اثر انداز ہوسکتے ہیں۔
