گوگل نیوز پر ہمیں فالو کریںنیشنل ڈیٹا بیس اینڈ رجسٹریشن اتھارٹی ( نادرا ) نے تمام شادی شدہ شہریوں کے لیے ایک اہم اور ضروری پیغام جاری کرتے ہوئے کہا ہے کہ نکاح یا شادی کے بعد اپنی ازدواجی حیثیت کو فوری طور پر نادرا کے ریکارڈ میں اپ ڈیٹ کروایا جائے۔
ترجمان نادرا کا کہنا ہے کہ متعلقہ یونین کونسل سے کمپیوٹرائزڈ نکاح نامہ یا میرج سرٹیفکیٹ حاصل کرنے کے بعد اس کا نادرا میں اندراج کروانا قانونی طور پر نہایت ضروری ہے۔ اس عمل سے نادرا کے ڈیٹا بیس میں آپ کے خاندان کا درست اور شفاف ریکارڈ بروقت اپ ڈیٹ ہو جاتا ہے۔
شہریوں کے لیے کن سہولیات میں آسانی ہوگی؟
نادرا حکام کا کہنا ہے کہ ازدواجی حیثیت بروقت اپ ڈیٹ ہونے سے شہریوں کو مستقبل میں کئی بڑے قانونی اور انتظامی فوائد حاصل ہوتے ہیں، جن میں درج ذیل سرفہرست ہیں:
بچوں کے ب-فارم (B-Form) کے حصول میں آسانی۔
بچوں اور والدین کے شناختی کارڈز (CNIC) کی بروقت تیاری۔
پاسپورٹ بنوانے کے عمل میں درپیش رکاوٹوں کا خاتمہ۔
ضرورت پڑنے پر فیملی رجسٹریشن سرٹیفکیٹ (FRC) اور جانشینی سرٹیفکیٹ کا فوری حصول۔
ازدواجی حیثیت کیسے تبدیل کروائیں؟
شہریوں کی سہولت کے پیش نظر نادرا نے اس عمل کو انتہائی آسان بنا دیا ہے۔ آپ اس کام کے لیے درج ذیل میں سے کسی بھی طریقے کا انتخاب کر سکتے ہیں۔
قریبی نادرا سینٹر: اپنے کمپیوٹرائزڈ میرج سرٹیفکیٹ کے ساتھ اپنے قریبی نادرا رجسٹریشن سینٹر کا وزٹ کریں۔
آن لائن سہولت: گھر بیٹھے اس عمل کو مکمل کرنے کے لیے آفیشل پاک آئی ڈی موبائل ایپ (Pak ID App) کا استعمال کریں۔
