گوگل نیوز پر ہمیں فالو کریںسکیورٹی فورسز میں عام طور پر بڑے اور طاقتور کتوں کو شامل کیا جاتا ہے تاہم میکسیکو کی نیشنل گارڈ میں ایک ایسا ننھا ریکروٹ شامل ہوا ہے جس نے اپنے انوکھے انداز اور دلکش شخصیت سے دنیا بھر میں دھوم مچا دی ہے۔ محض 7 کلوگرام وزن اور 21 سینٹی میٹر قد رکھنے والا چہواہوا (Chihuahua) نسل کا یہ ننھا کتا اب فورس کے سرچ اینڈ ریسکیو آپریشنز کے لیے خصوصی تربیت حاصل کر رہا ہے۔
صرف 13 ماہ عمر کے کمانڈو کو خصوصی تربیت کے دوران چھوٹی جسامت کے مطابق تیار کیا گیا ٹیکٹیکل ویسٹ، ہیلمٹ، چشمہ اور سر پر نصب کیمرہ بھی پہنایا جاتا ہے۔
نیشنل گارڈ کے حکام کے مطابق کمانڈو کو محض عوام کی توجہ حاصل کرنے والے ماسکوٹ کے طور پر نہیں رکھا گیا بلکہ اسے تلاش اور امدادی کارروائیوں کے لیے بھی تربیت دی جارہی ہے۔
صرف 21 سینٹی میٹر قد رکھنے والا کمانڈو عام طور پر پولیس یا فوجی یونٹس میں نظر آنے والے طاقتور اور جسیم تربیت یافتہ کتوں سے بالکل مختلف ہے۔ میکسیکو سٹی میں حالیہ تربیتی مشق کے دوران ننھے کمانڈو نے سیڑھیاں چڑھنے کے ساتھ مختلف رکاوٹیں بھی عبور کیں، جبکہ اس دوران ’روکو‘ نامی بڑا اور مکمل تربیت یافتہ کتا بھی موجود تھا۔
لیفٹیننٹ ڈیبورا ہرنینڈز کے مطابق کمانڈو نے نیشنل گارڈ سے متعلق دو عام تصورات کو چیلنج کیا ہے۔ ایک یہ کہ صرف بڑے کتے ہی فورس میں خدمات انجام دے سکتے ہیں اور دوسرا یہ کہ فوجی طرز کی فورس عوام کے ساتھ دوستانہ تعلق قائم نہیں کرسکتی۔
ان کا کہنا تھا کہ کمانڈو کی موجودگی لوگوں کو یہ احساس دلاتی ہے کہ وردی کے پیچھے بھی انسان ہی موجود ہیں۔
بزرگ مالکان کی دیکھ بھال سے نیشنل گارڈ تک
کمانڈو کو تقریباً 6 ماہ قبل میکسیکو کی شمالی ریاست چہواہوا سے نیشنل گارڈ نے اپنی تحویل میں لیا تھا۔ اس نسل کے نام سے موسوم ریاست میں اس وقت کمانڈو کے بزرگ مالکان اس کی دیکھ بھال کے قابل نہیں رہے تھے، جس کے بعد اسے فورس میں شامل کرلیا گیا۔
اب کمانڈو سرکاری تقریبات، اسکولوں کے پروگراموں اور عوامی رابطہ مہمات میں بھی شرکت کرتا ہے۔
میکسیکو کی نیشنل گارڈ کے تقریباً 350 کتوں پر مشتمل یونٹ میں کمانڈو اپنی غیر معمولی جسامت اور نسل کے باعث منفرد حیثیت رکھتا ہے۔ اس فورس میں زیادہ تر جرمن شیفرڈ اور لیبراڈور ریٹریور جیسی روایتی ورکنگ ڈاگ نسلیں شامل ہیں۔
چہواہوا نسل کے کتے اپنے بڑے سیدھے کانوں، توانا شخصیت اور تاثراتی آنکھوں کے لیے مشہور ہیں تاہم انہیں عموماً پولیس یا فوجی نوعیت کے سنجیدہ آپریشنل کاموں کے لیے موزوں نہیں سمجھا جاتا۔
کمانڈو اب تک میکسیکو کے یوم آزادی کی پریڈ میں بھی شرکت کرچکا ہے۔ اس کی مقبولیت کا اندازہ اس بات سے بھی لگایا جاسکتا ہے کہ سوشل میڈیا پر اس کے میمز گردش کررہے ہیں جبکہ اس کی اپنی کارٹون نما تصویر بھی تیار کی جاچکی ہے۔
