گوگل نیوز پر ہمیں فالو کریںقومی ٹیم کے مایہ ناز وکٹ کیپر بیٹر اعظم خان نے سوشل میڈیا پر اپنی موت سے متعلق گردش کرنے والی من گھڑت اور جعلی افواہ پر انتہائی دلچسپ اور ہنس مکھ انداز میں اپنا ردعمل ظاہر کیا ہے۔
گزشتہ روز سوشل میڈیا کے مختلف پلیٹ فارمز پر اعظم خان کی ناگہانی موت سے متعلق ایک جعلی خبر تیزی سے پھیلائی گئی جس پر صارفین کی جانب سے شدید حیرت کا اظہار کیا گیا تاہم اس بے بنیاد افواہ کے جواب میں اعظم خان کی ایک ویڈیو سامنے آئی ہے جس میں وہ اپنے دوستوں کے ساتھ بیٹھے اس جعلی خبر پر ہنستے ہوئے نظر آ رہے ہیں۔
ویڈیو میں قومی کرکٹر نے طنزیہ لہجے میں اپنے بارے میں بات کرتے ہوئے کہا کہ اچھا کھلاڑی تھا، بیچارہ کل پاکستان کے لیے کھیلنے والا تھا مگر مر گیا۔
View this post on Instagram
اعظم خان کا بین الاقوامی کیریئر
28 سالہ جارح مزاج بیٹر اعظم خان نے پاکستان کی جانب سے آخری مرتبہ 6 جون 2024 کو امریکہ کے خلاف ٹی ٹوئنٹی ورلڈ کپ کے میچ میں شرکت کی تھی۔ وہ اب تک پاکستان کے لیے مجموعی طور پر 14 ٹی ٹوئنٹی انٹرنیشنل میچز کھیل چکے ہیں جن میں انہوں نے 88 رنز اسکور کیے ہیں۔
سوشل میڈیا پر جعلی خبروں کا بڑھتا ہوا رجحان
واضح رہے کہ حالیہ کچھ عرصے کے دوران مصنوعی ذہانت (AI) کے غلط استعمال اور سوشل میڈیا پر سستی شہرت حاصل کرنے کی دوڑ کی وجہ سے نامور شخصیات کے حوالے سے موت یا حادثات کی جعلی خبریں پھیلنے کے رجحان میں خطرناک حد تک اضافہ ہوا ہے جس پر شائقین اور مبصرین کی جانب سے سخت تشویش کا اظہار کیا جاتا رہا ہے۔
