گوگل نیوز پر ہمیں فالو کریںخیبرپختونخوا کے ضلع چارسدہ میں سرڈھیری پولیس نے بروقت کارروائی کرتے ہوئے اسلحے کے زور پر اغوا کی گئی 16 سالہ لڑکی کو ضلع ہنگو سے بحفاظت بازیاب کرلیا جبکہ ایک خاتون سمیت تین ملزمان کو گرفتار کرلیا گیا۔
ڈی پی او چارسدہ رفعت اللہ خان کے مطابق 10 ستمبر 2026 کو کم عمر لڑکی کے اغوا کی اطلاع ملنے پر مقدمہ درج کرکے فوری تفتیش شروع کی گئی۔ مغویہ کی بازیابی کے لیے پانچ خصوصی ٹیمیں تشکیل دی گئیں جنہوں نے مردان، راولپنڈی، گوجر خان، پشاور، ٹل، دوآبہ اور ہنگو سمیت مختلف علاقوں میں کارروائیاں کیں۔
پولیس کی ایک ٹیم کو تکنیکی امور کی ذمہ داری سونپی گئی جس نے 100 سے زائد موبائل نمبرز کا ڈیٹا اور کال ڈیٹیل ریکارڈ (CDR) حاصل کرکے تجزیہ کیا جس کے نتیجے میں پولیس مغویہ تک پہنچنے میں کامیاب ہوئی۔
ابتدائی تفتیش کے مطابق واقعہ دونوں خاندانوں کے درمیان رشتے کے تنازع کا شاخسانہ ہے۔ پولیس کے مطابق ملزمان نے پہلے لڑکی کا رشتہ مانگا اور انکار پر مبینہ طور پر اسے گھر سے اسلحے کے زور پر اغوا کرلیا۔
پولیس نے کارروائی کے دوران خاتون سمیت تین افراد کو گرفتار کیا جن میں دو مرد شوکت ایاز اور ریاض خانزادہ شامل ہیں۔ گرفتار ملزمان سے مزید تفتیش جاری ہے۔
ڈی پی او رفعت اللہ خان نے کہا کہ چارسدہ پولیس شہریوں بالخصوص خواتین کے تحفظ کے لیے مؤثر اقدامات کر رہی ہے اور جرائم میں ملوث عناصر کے خلاف قانون کے مطابق سخت کارروائی کی جائے گی۔
