گوگل نیوز پر ہمیں فالو کریںپاک سرزمین پارٹی کے چیئرمین مصطفیٰ کمال نے کہا ہے کہ کراچی کی شہری حکومت کے پاس لندن والے اختیارات ہوں تب بھی کراچی کا یہی حال ہوگا جو ہم دیکھ رہے ہیں۔
مصطفیٰ کمال نے میڈیا سے بات چیت کرتے ہوئے کہا کہ شہری حکومت میں کردار والے لوگ نہیں ہیں۔ کراچی کے سیاستدان لڑائی نہیں کر رہے بلکہ میں یہ بتا رہا ہوں کہ روشنیوں کے شہر کو کیسے چلایا جاتا تھا۔
ا نہوں نے کہا کہ کراچی والوں کوخود دیکھنا ہے کہ کون سا لیڈر ان کے کام نہیں آ رہا اور اختیارات کے باوجود کام نہیں کر رہا۔ ہمارے دور میں لوگوں کے مسائل حل ہو رہے تھے۔میں مطالبہ کرتا ہوں کہ وزیر اعظم عمران خان اور آرمی چیف جنرل قمر جاوید باجوہ یہاں آئیں اور کراچی کی صورتحال ٹھیک کریں۔
یہ بھی پڑھیں: پیپلز پارٹی کے رکن نے نیب آرڈیننس میں ترمیم کا بل سینیٹ میں پیش کردیا
مصطفیٰ کمال نے مزید کہا کہ عالمی جریدے نے مجھے دُنیا کے تین بہترین میئرز میں سے ایک قرار دیا تھا۔ آج صورتحال اس کے برعکس ہے اور کراچی میں مکھیوں پر مضامین شائع کیے جا رہے ہیں۔
یاد رہے کہ میئر کراچی وسیم اختر نے چیئرمین پاک سرزمین پارٹی مصطفیٰ کمال کو ایک روز قبل پروجیکٹ ڈائریکٹر گاربیج تعینات کرنے کے بعد ڈرامائی انداز میں اگلے ہی روز ان کے عہدے سے ہٹا دیا۔
شہر قائد میں مصطفیٰ کمال جیسے پروجیکٹ ڈائریکٹر گاربیج کے آنے کے بعد شہریوں کو امید ہو چلی تھی کہ شاید اِس بار صفائی ستھرائی کے کام کا سنجیدگی سے آغاز ہوگا لیکن یہ امید اگلے ہی دن میئر کراچی نے ختم کردی جبکہ مصطفٰی کمال یہ کہہ چکے تھے کہ وہ تین ماہ میں شہر کو صاف کردیں گے اور دن رات کام کریں گے۔
مزید پڑھیں: میئر کراچی وسیم اختر نے پروجیکٹ ڈائریکٹر گاربیج مصطفٰی کمال کو عہدے سے ہٹا دیا
