گوگل نیوز پر ہمیں فالو کریںعیدالاضحیٰ کی آمد کے پیشِ نظر اسلام آباد کی ضلعی انتظامیہ نے وفاقی دارالحکومت میں مویشی منڈیوں کو منظم کرنے کی تیاریاں شروع کر دی ہیں اور فیصلہ کیا ہے کہ غیر قانونی مویشی منڈیاں بند کی جائیں گی جبکہ پانچ سرکاری مویشی منڈیاں مختلف علاقوں میں قائم کی جائیں گی جن کے لیے واضح قواعد و ضوابط ہوں گے۔
اس سلسلے میں ڈپٹی کمشنر (ڈی سی) اسلام آباد عرفان نواز میمن نے بتایا کہ پانچ سرکاری مویشی منڈیاں دارالحکومت کے مختلف علاقوں میں قائم کی جائیں گی۔ ان میں سنگجانی، سیکٹر I-15، بھارہ کہو، لہتراڑ روڈ، اور اسلام آباد ایکسپریس وے شامل ہیں۔
ڈپٹی کمشنر کے مطابق ان منڈیوں کے قیام کے لیے ٹینڈر نوٹس پہلے ہی جاری کیے جا چکے ہیں۔ انہوں نے بتایا کہ یہ سرکاری منڈیاں یکم سے 13 ذوالحجہ تک کھلی رہیں گی اور اس مدت سے پہلے جانوروں کی خرید و فروخت کی اجازت نہیں ہوگی۔ منتخب شدہ مقامات سے ہٹ کر قائم کی جانے والی کوئی بھی منڈی غیر قانونی تصور کی جائے گی۔
انتظامیہ نے بیوپاریوں سے درخواست کی ہے کہ وہ صرف منظور شدہ منڈیوں میں ہی اپنے جانور لائیں۔ کسی غیر منظور شدہ مقام پر جانوروں کی فروخت ضوابط کی خلاف ورزی ہوگی اور اس پر سخت کارروائی کی جائے گی۔
ٹریفک کے مسائل، صحت کے خطرات اور عوامی پریشانی سے بچنے کے لیے انتظامیہ نے منظم انتظامات پر زور دیا ہے۔ مخصوص علاقوں میں مویشی منڈیوں کا قیام صفائی اور بہتر نظم و نسق کو یقینی بنانے کے لیے کیا جا رہا ہے۔
