گوگل نیوز پر ہمیں فالو کریںاسلام آباد: دفترِ خارجہ کا کہنا ہے کہ وزیرِ خارجہ بلاول بھٹو زرداری کل سے 21دسمبر تک امریکا کا دورہ کریں گے۔
تفصیلات کے مطابق ترجمان دفترِ خارجہ نے بلاول بھٹو زرداری کے دورۂ امریکا کے متعلق بیان جاری کردیا۔ وزیر خارجہ 15 اور 16 دسمبر کو نیو یارک میں جی 77 اور چین کی وزارتی کانفرنس کی میزبانی کریں گے۔
پی ٹی آئی، ن لیگ، پیپلز پارٹی تینوں نے ملک تباہ کیا، سراج الحق
ترجمان دفترِ خارجہ کا کہنا ہے کہ 2 روزہ کانفرنس میں کورونا، اقتصادی ترقی اور ماحولیاتی تبدیلی پر تبادلۂ خیال کیا جائے گا۔ وزیر خارجہ اقوامِ متحدہ کے سیکریٹری جنرل انتونیو گوتریس سے ملاقات کریں گے۔
دفترِخارجہ کا کہنا ہے کہ وزیر خارجہ عالمی امن و سلامتی کے موضوع پر اقوامِ متحدہ کی سلامتی کونسل میں ہونے والے مباحثے میں شریک ہوں گے اور خطے کی سکیورٹی صورتحال پر روشنی ڈالیں گے۔
بعد ازاں وزیرِ خارجہ بلاول بھٹو زرداری 19 دسمبر کو امریکی دارالحکومت جائیں گے۔ ترجمان دفترِ خارجہ کا کہنا ہے کہ وزیر خارجہ واشنگٹن میں امریکی کانگریس کے رہنماؤں سے ملاقات کریں گے۔
دورۂ امریکا کے دوران بلاول بھٹو زرداری حکومتی عہدیداروں اور پاکستانی سرمایہ کاروں سے ملاقاتیں کریں گے۔ خیال رہے کہ پاکستان اور امریکا کے مابین دو طرفہ تعلقات طویل عرصے سے قائم ہیں۔
