ڈیوس کپ مقابلے پاکستان سے منتقل کرنے پراعصام الحق ایونٹ سے دستبردار

لاہور: پاکستانی ٹینس اسٹار اعصام الحق نے ڈیوس کپ مقابلے پاکستان سے باہر منتقل کرنے پراحتجاجاًایونٹ کابائیکاٹ کردیا۔

پاکستان ٹینس فیڈریشن کو لکھے گئے خط میں اعصام الحق نے کہا ہے کہ بھارت کی ڈیوس کپ میں عدم شمولیت غیرمنصفانہ فیصلہ ہے، انٹرنیشنل ٹینس فیڈریشن نے پاکستان سے ناانصافی کی ہے۔ پاکستان میں کسی بھارتی شہری کو کوئی خطرہ نہیں اور اگر ایونٹ پاکستان سے منتقل ہواتوحصہ نہیں لوں گا۔

اعصام الحق نے اپنے خط میں بھارتی ٹینس حکام کو بھی آڑے ہاتھ لیا اور کہا کہ ان کے پاکستان نہ آنے کے لیے بہانے قابل قبول نہیں اور یہ کہنا کہ یہاں ان کو مناسب سیکیورٹی نہیں مل سکتی ، توہین آمیز ہے۔

اعصام الحق نے کہا کہ بھارتی بلا خوف کرتارپور، ننکانہ صاحب اور ٹیکسلا آ رہے ہیں، سری لنکا کی کرکٹ ٹیم لاہور میں کھیل چکی ہے، بنگلا دیش کی ٹیمیں مختلف شہروں میں کھیل چکی ہیں، برطانوی شاہی جوڑا اسلام آباد اور لاہور کی سیر کرچکا ہے، ہالینڈ کی وزیر اعظم پاکستان آرہی ہیں۔ ایسے میں آل انڈیا ٹینس ایسوسی ایشن کے کہنے پر مقابلے بیرون ملک منتقل کردینا پاکستانی عوام سے زیادتی ہے۔

اعصام الحق نے واضح کیا کہ ان کی ترجیح ہمیشہ پاکستان کے لیے کھیلنا ہے لیکن یہ معاملہ ملک کے وقار کا ہے ،ٹائی کھیلنے کا مطلب ہوگا کہ آپ اس جانبدارنہ فیصلے کو قبول کرتے ہیں اور وہ اس فیصلے کو قبول نہیں کرتے۔

یاد رہے کہ 5 نومبر کو آئی ٹی ایف نے ڈیوس کپ ٹائی کی میزبانی پاکستان سے یہ کہہ کر واپس لی تھی کہ اسے کھلاڑیوں اور آفیشلز کی سکیورٹی سب سے زیادہ عزیز ہے، پاکستان میں دھرنے بھی جاری ہیں، سکیورٹی ماہرین کی تازہ رپورٹ کی روشنی میں ڈیوس کپ ٹائی کو نیوٹرل مقام پر منتقل کیا جا رہا ہے۔