پاکستان کے خلاف فیصلہ کن ٹیسٹ کا چوتھا روز، آسٹریلیا کی پوزیشن مستحکم

لاہور: پاکستان کے خلاف تیسرے اور آخری فیصلہ کن ٹیسٹ میچ کے چوتھے روز آسٹریلیا نے اپنی پوزیشن مستحکم کرلی ہے جبکہ پہلی اننگز میں 268 رنز بنا کر آؤٹ ہونے والی قومی ٹیم کے بولرز مہمان ٹیم کے بلے بازوں کے سامنے تاحال ناکام ہیں۔

تفصیلات کے مطابق آسٹریلین کرکٹ ٹیم پہلی اننگز میں 391رنز بنا کر پویلین لوٹ گئی تھی، تاہم دوسری اننگز میں 54 اوورز کے اختتام پر مہمان ٹیم نے صرف 2 وکٹوں کے نقصان پر 197 رنز بنائے اور 320 رنز کی برتری حاصل کرلی ہے۔

یہ بھی پڑھیں:

ٹی ٹوئنٹی میچ اور ون ڈے سیریز، آسٹریلیا کی وائٹ بال ٹیم پاکستان پہنچ گئی

قومی ٹیم نے آغاز میں جاندار بیٹنگ کی تاہم 256 رنز پر 5 وکٹیں گنوانے کے بعد باقی کھلاڑی زیادہ دیر تک آسٹریلین بولرز کا سامنا نہ کرسکے اور ایک ایک کرکے آؤٹ ہوتے رہے۔ قومی ٹیم صرف 116 اوورز میں 268 رنز پر آؤٹ ہوگئی۔

دوسری جانب آسٹریلیا کی دوسری اننگز کا آغاز پہلی اننگز کے مقابلے میں بہتر ہوا ہے۔ اوپنر عثمان خواجہ نے 100 رنز مکمل کر لیے جبکہ ڈیوڈ وارنر نے آؤٹ ہونے سے قبل ففٹی مکمل کر لی تھی۔ مارنس نے بھی اپنی وکٹ 36رنز کے بعد گنوائی۔

خیال رہے کہ اس سے قبل دوسرے ٹیسٹ میچ میں بابر اعظم کی 196رنز کی اننگز نے قومی کرکٹ ٹیم کو شکست سے بچالیا تاہم تیسرے میچ میں کپتان بابر اعظم پہلی اننگز کے دوران زیادہ طویل اسکور نہ کرسکے اور 67رنز بنا کر پویلین لوٹ گئے۔

چوتھے روز کے دوسرے سیشن تک آسٹریلیا نے 2 وکٹوں کے نقصان پر 202 رنز بنائے۔ عثمان خواجہ نے اپنی سنچری مکمل کرلی جبکہ اسٹیو اسمتھ 12 رنز پر ناقابلِ شکست ہیں۔ مہمان ٹیم کو مجموعی طور پر پاکستان پر 325رنز کی برتری حاصل ہے۔