ایران سے درآمد کیا گیا 352ٹن ٹماٹر سبزی منڈی کی زینت بن گیا، قیمتوں میں کمی

کراچی :ایران سے درآمد کیا گیا 352ٹن ٹماٹر سبزی منڈی کی زینت بن گیا۔ کراچی کی منڈی میں قیمت 350 روپے سے کم ہوکر 200 روپے پر آگئی ۔

عام بازاروں میں منافع خور اب بھی صارفین کو لوٹ رہے ہیں۔ کمشنرکراچی نے شہریوں کو مہنگے ٹماٹروں کا بائیکاٹ کرنے کا مشورہ دے دیا۔

کراچی میں ٹماٹر کی طلب و رسد کا مسئلہ مزید سنگین ہوگیا ہے۔ ٹماٹر کی قیمت 400 روپے کلو تک پہنچنے کے بعد ایران سے ٹماٹر درآمد کیا گیا۔

مزید پڑھیں :سبزیوں کی قیمتوں میں ہوش رُبا اضافہ، مہنگائی آسمان سے باتیں کرنے لگی

ایران سے 16 کنٹینر درآمد ہوئے تو کراچی کی سبزی منڈی میں قیمتیں کم ہوگئیں۔ تاہم فوری طور پر عوام کو ابھی تک ریلیف نہیں ملا ہے۔عام بازاروں میں ٹماٹر اب بھی 300 روپے سے کم میں دستیاب نہیں ہے۔

کمشنرکراچی کا کہنا ہے کہ ہر ٹھیلے اور دکان پر سرکاری افسر کھڑا نہیں کرسکتے البتہ درآمدکنندگان کو امید ہے کہ ساڑھے 4 ہزار ٹن ٹماٹر درآمد ہونے کے بعد دام گر سکتے ہیں۔