چوہدری شوگر ملز کیس‘مریم نواز اور یوسف عباس کے جوڈیشل ریمانڈ میں 14روز کی توسیع

لاہور: چوہدری شوگر ملز کیس میں احتساب عدالت نے مریم نواز اور یوسف عباس کے جوڈیشل ریمانڈ میں 14روز کی توسیع کر دی۔

احتساب عدالت کے جج امیر محمد خان کی عدالت میں مریم نواز اور یوسف عباس کو دو روزہ جوڈیشل ریمانڈ ختم ہونے پر پیش کیا گیا،اس دوران کمرہ عدالت ن لیگی رہنماؤں سے بھرا ہوا تھا۔

دوران سماعت نیب پراسیکیوٹر نے بتایا کہ مریم نواز اور یوسف عباس کے خلاف 2018میں انکوائری شروع کی گئی، مریم نواز نے غیر ملکیوں کی ملی بھگت سے چوہدری شوگر ملز کی آڑ میں منی لانڈرنگ کی،ملزمہ نے ملز کی مرکزی شیئر ہولڈر ہونے کے ساتھ ساتھ ابتدائی دور میں بھاری سرمایہ کاری بھی کی۔

اس موقع پر نوازشریف کے وکیل نے موقف اپنایا کہ ان کے موکل سروسز اسپتال میں زیرعلاج ہیں،اس لیے حاضری سے استثنی ٰکی درخواست منظور کی جائے۔

عدالت نے دلائل سننے کے بعد مریم نواز اور یوسف عباس کے جوڈیشل ریمانڈ میں 14روز کی توسیع کرتے ہوئے نواز شریف کے جسمانی ریمانڈ پر رپورٹ طلب کی۔

اس موقع پر عدالت نے سیاسی شخصیات کی عدالتی کارروائی پر ٹی وی پروگرام میں بات کرنے اور کمرہ عدالت میں ویڈیوز اور سیلفیاں بنانے پر پابندی عائد کی عدالت نے پابندی کے حوالے سے کمرہ عدالت کے اندر اور باہر نوٹس لگانے کی ہدایت بھی کی ہے۔

احتساب عدالت میں پیشی کے موقع پر میڈیا سے گفتگوکرتے ہوئے مریم نواز نے کہاکہ میں اتنی دیر جیل میں رہی ہوں لیکن اللہ کا شکر ہے کہ مجھ پر کوئی ذہنی دباؤ نہیں تھا لیکن جب سے والد کی طبیعت خراب ہوئی ہے اس نے مجھے بہت بری طرح متاثر کیا ہے ۔

مریم نوازنے کہا کہ میری اپنی طبیعت ناساز نہیں ہے لیکن والد کی بیماری نے مجھے بری طرح متاثر کیا ہے ،ہرتکلیف برداشت ہو جاتی ہے لیکن والدین کی ایسی حالت کوبرداشت نہیں کیا جاسکتا ایک سال پہلے میری والدہ اسی طرح شدید علیل ہو کر اللہ کو پیاری ہو گئیں اور اس کی وجہ سے انسان سہم جاتاہے۔