احتساب عدالت نے حمزہ شہباز کے جوڈیشل ریمانڈ میں12نومبر تک توسیع کردی

لاہور:احتساب عدالت نے پنجاب اسمبلی میں قائد حزب اختلاف حمزہ شہباز کے جوڈیشل ریمانڈ میں 12 نومبر تک توسیع جبکہ مسلم لیگ(ن) کے صدر محمد شہباز شریف کی حاضری سے استثنیٰ کی درخواست منظور کر لی ۔

لاہور کی احتساب عدالت نے حمزہ شہباز کے خلاف رمضان شوگر ملز کیس کی سماعت 12 نومبر، جبکہ آمدن سے زائد اثاثہ جات اور منی لانڈرنگ کیس کی سماعت 13 نومبر تک ملتوی کر دی۔

احتساب عدالت کے جج امجد نذیر چوہدری نے رمضان شوگر ملز کیس کی سماعت کی ۔حمزہ شہباز کو کوٹ لکھپت جیل لا کر عدالت میں پیش کیاگیا ۔ عدالت نے نیب پراسیکیوٹر سے استفسار کیا کہ رمضان شوگر مل کیس کا ریفرنس کب دائر ہوگا جس پر نیب پراسیکیوٹر نے بتایا کہ ریفرنس چیئرمین نیب کی منظوری کے بعد جلد دائر کر دیا جائے گا۔

دوران سماعت شہباز شریف کے وکیل نے عدالت کو بتایا کہ کمر درد کے باعث شہباز شریف پیش نہیں ہوسکتے حاضری سے استثنیٰ دیا جائے۔ عدالت نے حاضری معافی کی تحریری درخواست منظور کر لی۔

عدالت نے نیب کو حکم دیا کہ آئندہ سماعت پر کیس کا مکمل ریفرنس دائر کیا جائے، رمضان شوگر ملز کیس میں شہباز شریف اور حمزہ شہباز پر چنیوٹ میں سرکاری خزانے سے نالہ اور پل بنانے کا الزام ہے۔