پاکستان اسٹاک مارکیٹ میں سال کے آخری روز اتار چڑھاؤ کے بعد مندی

کرا چی :پاکستان اسٹاک مارکیٹ میں سال 2019کے آخری روز اتار چڑھاؤ جاری رہنے کے بعد مندی غالب آگئی جس کے نتیجے میں کے ایس ای100انڈیکس152.55پوائنٹس کی کمی سے40735.08پوائنٹس کی سطح پرآ گیا ۔

حصص فروخت کا دباؤ بڑھنے کے باعث48.67فیصد کمپنیوں کے حصص کی قیمتوں میں کمی ریکارڈکی گئی جس کی وجہ سے سرمایہ کاروں کو24 ارب26 کروڑ23لاکھ روپے کا نقصان اٹھانا پڑا ۔کاروباری حجم پیرکی نسبت2.93فیصدزائد رہا۔

پاکستان اسٹاک مارکیٹ میں منگل کو ٹریڈنگ کا آغاز مثبت زون میں ہوا جس کے سبب ٹریڈنگ کے ابتدائی اوقات میں کے ایس ای100 انڈیکس 40997.50پوائنٹس کی بلند سطح پرپہنچ گیاتاہم بعد ازاں پرافٹ ٹیکنگ کے باعث سرمایہ کاروں کی جانب سے حصص فروخت کا رجحان دیکھنے میں آیا جس سے تیزی کے اثرات زائل ہوگئے اور مارکیٹ مندی کی لپیٹ میں آگئی۔

مزید پڑھیں: دنیا کے متعدد ممالک میں پاکستان سے 9 گھنٹے قبل ہی نئے سال کا آغاز ہوگیا

انڈیکس 40671پوائنٹس کی نچلی سطح پر آگیا تھا بعد میں ریکوری آئی اور انڈیکس 40700پوائنٹس کی سطح پر بحال ہو گیا لیکن مندی غالب رہی اور مارکیٹ کے اختتام پر کے ایس ای100انڈیکس152.55پوائنٹس کی کمی سے40735.08پوائنٹس پر بند ہوا۔

اسی طرح کے ایس ای 30انڈیکس95.62پوائنٹس کی کمی سے 18656.48پوائنٹس اور کے ایس ای آل شیئرز انڈیکس 90.11پوائنٹس کی کمی سے29011.73پوائنٹس پر بند ہوا۔ مندی کے سبب مارکیٹ کے سرمائے میں24  ارب26کروڑ23لاکھ روپے کی کمی ہوئی جس کے نتیجے میں مارکیٹ کا مجموعی سرمایہ گھٹ کر 78کھرب11ارب 81کروڑ24لاکھ روپے ہوگیا ۔

گزشتہ روزمجموعی طور پر17کروڑ71لاکھ شیئرز کا کاروبار ہوا جو پیر کی نسبت 1کروڑ60لاکھ شیئرز کم ہے۔ قیمتوں میں اتار چڑھاؤ کے لحاظ سے انڈس ڈائنگ کے حصص کی قیمت 22روپے کے اضافے سے بڑھ کر559.99روپے اور اللہ وسایا ٹیکس کے حصص 16.25روپے کے اضافے سے 341.25روپے ہوگئی ۔

رفحان میظ اورنیسلے کے حصص کی قیمتوں میں باترتیب59.90روپے اور50روپے کی کمی ہوئی جس سے رفحان میظ کے حصص کی قیمت 7251روپے اورنیسلے پاکستان کے حصص کی قیمت 8050روپے ہوگئی۔ نمایاں کاروباری سرگرمیوں کے لحاظ سے یونٹی فوڈز، کے الیکٹرک، فوجی فوڈز، سلک بینک،ہیسکول پٹرول، ٹی آر جی،صدیق سنز ،کوٹ ادو پاور،ورلڈ کال ٹیلی کام اور فوجی فرٹیلائزر کے شیئرز نمایاں رہے ۔