اسپیکر نے شہباز شریف کا چیئرمین پی اے سی کے عہدے سے استعفیٰ منظور کر لیا

اسلام آباد:اسپیکرقومی اسمبلی اسد قیصر نے چیئرمین پبلک اکاؤنٹس کمیٹی کے عہدے سے استعفیٰ قبول کرلیا ۔ اس سلسلہ میں اسمبلی سیکرٹریٹ کی جانب سے باضابطہ نوٹیفکیشن بھی جاری کر دیا گیا ۔

نوٹیفکیشن کے مطابق شہبازشریف کے استعفیٰ کا اطلاق آج مورخہ 20 نومبر 2019 سے ہوگا، اسمبلی سیکریٹریٹ نے پبلک اکاؤنٹس کمیٹی کے نئے چیئرمین کے انتخاب کے لیے کمیٹی کا اجلاس بھی طلب کرلیا ہے۔

سیکریٹریٹ سے جاری بیان میں کہا گیا کہ کمیٹی کا اجلاس 28 نومبر کو دن 11 بجے پارلیمنٹ ہاؤس میں منعقد ہوگا، بیان میں کہا گیا کہ پبلک اکاؤنٹس کمیٹی کا اجلاس قومی اسمبلی کے قواعد و ضوابط اور طریقہ کار کے قاعدہ 225 (1) کے تحت طلب کیا گیا ہے۔

واضح رہے کہ شہبازشریف نے رواں سال جون میں پبلک اکاؤنٹس کمیٹی کی چیئرمین شپ چھوڑنے کا اعلان کرتے ہوئے کہا تھا کہ ہم نے رانا تنویر کا نام چیئرمین پبلک اکاؤنٹس کمیٹی کےلیے دےدیاہے اور ہم نے انتخابی دھاندلی کمیشن سے استعفے دینے کا فیصلہ کر لیا ہے۔

ن لیگ نے سیالکوٹ سے منتخب رکن قومی اسمبلی اور سابق وفاقی وزیر خواجہ آصف کو شہباز شریف کی جگہ قومی اسمبلی میں پارٹی کا پارلیمانی لیڈر منتخب کرنے کا بھی فیصلہ کیا تھا۔