کراچی کی اکتالیس یونین کونسلز میں اسمارٹ لاک ڈاؤن نافذ، ناکے لگا دیے گئے

کراچی: کراچی کی اکتالیس یونین کونسلز میں اسمارٹ لاک ڈاؤن کا نفاذ، اس سلسلے میں متعدد علاقوں کو ناکے لگا کر سیل کردیا گیا ہے، لاک ڈاؤن کا نفاذ 14روز کے لئے کیا گیا ہے۔

شام کے 7بجتے ہی قانون نافذ کرنے والے ادارے حرکت میں آگئے اور اکتالیس یونین کونسلز کو سیل کرنے کا عمل شروع کردیا گیا، ضلع شرقی کی 17اور 6یونین کونسلز میں ناکے لگا دیئے گئے اور علاقوں کو سیل کردیا گیا۔

اسمارٹ لاک ڈاؤن کی مد میں گلشن اقبال، صفورا گوٹھ اور گلستان جوہر بلاک تیرہ کی یوسیز جبکہ بلتی محلہ، مارٹن کوارٹرز، تین ہٹی، جہانگیر روڈ ایک اور دو نمبر کے علاقے بھی سیل کردیئے گئے ہیں۔

دوسری جانب ضلع کورنگی اور جنوبی کی پانچ، پانچ جبکہ ملیر کی چھ اور ضلع وسطی کی دو یوسیز کو بھی ناکے لگا کر سیل کردیا گیا ہے، ملیر، جعفرطیار سوسائٹی، جناح سکوائر، شاہ فیصل کالونی، لانڈھی 36 بی اور کورنگی کے مختلف علاقوں میں اسمارٹ لاک ڈاؤن نافذ کردیا گیا ہے۔

ضلعی انتظامیہ کے مطابق 18 جون سے 2 جولائی تک حساس یوسیز میں مکمل لاک ڈاؤن نافذ رہے گا،متاثرہ علاقوں میں رہائشیوں کی نقل و حرکت پر سخت پابندی عائد کردی گئی ہے، گھر کے صرف ایک فرد کو باہر جانے کی اجازت ہوگی۔ واضح رہے کہ کریانہ اور میڈیکل اسٹورز متاثرہ علاقوں میں کھلے رہیں گے۔